Buxoroda “Leapmotor” avtomobillari ishlab chiqariladi

Joriy yil 1-aprel kuni Buxoro viloyatida Prezident raisligida o‘tkazilgan yig‘ilishda Xitoy Xalq Respublikasining “Zhejiang Leapmotor Technology Co., Ltd.” kompaniyasi ishtirokida viloyatda avtomobil ishlab chiqarish quvvatlarini bosqichma-bosqich yo‘lga qo‘yish loyihasi taqdimot qilingan.

Loyihaning ishlab chiqarish va daromadlar rejasi quyidagicha belgilangan:

-      2026-yilda — 20 ming dona avtomobil (50 mln dollar);

-      2027-yilda — 40 ming dona avtomobil (100 mln dollar);

-      2028-yilda — 60 ming dona avtomobil (150 mln dollar);

-      2029-yilda — 100 ming dona avtomobil (200 mln dollar);

-      2030-yilda — 150 ming dona avtomobil (300 mln dollar);

-      2031-yilda — 200 ming dona avtomobil (350 mln dollar).

Mazkur loyiha doirasida B10, B10L, A10, C01, C16 avtomobil modellarini ishlab chiqarish ko‘zda tutilgan.

Shuningdek, avtomobil butlovchi qismlarini bosqichma-bosqich mahalliylashtirish rejalashtirilgan. Jumladan, bamperlar, o‘rindiqlar, oynalar, eshik qoplamalari, shinalar, orqa ko‘rinish ko‘zgulari, simlar jamlanmasi, akkumulyatorlar, asboblar paneli, torpeda qismi, yoritish uskunalari va boshqa ayrim avtokomponentlarni mahalliy ishlab chiqarish maqsad qilinmoqda.

Loyihaga muvofiq, Buxoro viloyatini Markaziy Osiyodagi avtomobilsozlik va logistika xabi sifatida shakllantirish maqsad qilingan. Natijada kelgusida nafaqat ichki bozorni ta’minlash, balki qo‘shni mamlakatlar bozoriga chiqish imkoniyatlari ham kengayishi mumkin. 

Loyiha doirasida 2026-yilda 200 ta, 2028-yilda 1000 ta, 2031-yilda 3000 ta yangi ish o‘rinlari yaratish rejalashtirilgan.

Bundan tashqari, malakali muhandis va texnik kadrlar tayyorlash maqsadida Buxoro davlat texnika universiteti, Toshkent shahridagi INHA universiteti, Axborot texnologiyalari universiteti, Turin politexnika universiteti bilan hamkorlik qilinadi.

“Leapmotor” Xitoyning tez o‘sayotgan elektromobil ishlab chiqaruvchi kompaniyalaridan biri bo‘lib, 2015-yilda tashkil topgan.

Kompaniya 2025-yilda 600 mingda mashina sotgan, 2026-yilda esa bu raqamni 1 milliontaga yetkazishni maqsad qilgan.