Buxoroda pora bilan ushlangan prokuror 15 yilga qamaldi

Maʼlum boʻlishicha, Bahodir Gʻulomov Kogon tumani prokurori vazifasida ishlab kelgan. U mansabidan foydalanib fuqaroning juda koʻp miqdordagi pul mablagʻlarini qoʻlga kiritish maqsadida joriy yilning yanvar oyi boshlarida N.N. va xavfli retsidivist boʻlgan Z.A. bilan jinoiy til biriktirgan. 

Shundan soʻng 3 nafar sherik Buxoro viloyati prokuraturasida oʻta ogʻir jinoyatlarni tergov qilish boʻlimi tomonidan tergov harakatlari olib borilayotgan “Kogon yogʻ - ekstraksiya zavodi” AJ mansabdor shaxslariga nisbatan jinoyat ishi boʻyicha jamiyat taʼsischilaridan birining ishonchiga kirgan. Ular mazkur shaxslarga ayblov eʼlon qilmaslik masalasini Buxoro viloyati prokuraturasida ishlovchi mansabdorlar orqali hal etishi mumkinligini aytgan. Ushbu ishni bajarish uchun fuqarodan 100 ming AQSh dollari miqdorida pora olishga kelishgan. 

Keyinchalik  Gʻulomov 2024 yil 15 yanvar kuni Buxoro shahrida joylashgan “Turon” mehmonxonasi oldida 100 ming AQSh dollarini jinoiy sherigi N.N. orqali olgan. Shuningdek, u jinoiy harakatlarini davom ettirib, “Kogon yogʻ - ekstraksiya zavodi” AJga aloqador shaxslarni Buxoro viloyat prokuraturasida ishlovchi mansabdor shaxslar orqali tergovga jalb qilmaslik va jinoiy javobgarlikka tortmaslik evaziga yana 100 ming AQSh dollari miqdorida pora soʻragan. Soʻralgan puldan 44 ming AQSh dollarini qoʻlga kiritgan. Shundan 10 ming AQSh dollarini Z.A. olib, qolgan 34 ming AQSh dollarini N.N. kelgusida Bahodir Gʻulomovga berish uchun oʻzida saqlab qolgan.

2024 yil 13 fevral kuni Buxoro shahar markaziy kasalxonasi yonida oʻtkazilgan tezkor tadbirda Bahodir Gʻulomov N.N. orqali 56 ming AQSh dollarini olgan vaqtida daliliy ashyolar bilan ushlangan. Tezkor tadbir davomida sudlanuvchi N.N. "Cobalt" rusumli mashinasidan “Kogon yogʻ - ekstraksiya zavodi” AJ mansabdor shaxslariga nisbatan jinoyat ishi boʻyicha jamiyatga aloqador toʻrt nafar shaxslarni tergovga jalb qilmaslik va jinoiy javobgarlikka tortmaslik evaziga soʻralgan 100 ming AQSh dollari hisobidan 34 ming AQSh dollari mavjudligi aniqlanib, tegishli tartibda bayonnoma asosida olib qoʻyilgan.

Sud majlisida sobiq prokuror aybiga iqror boʻlib, qilmishidan chin koʻngildan pushaymon ekanligini, davlat rahbaridan kechirim soʻrashini aytgan. Keyin suddan oʻziga nisbatan qonuniy yengillik berishni soʻragan.

Sud hukmi bilan Bahodir Gʻulomov Jinoyat kodeksining 168-moddasi 4-qismi “a” bandi (juda koʻp miqdorda firibgarlik), 28, 211-moddasi 3-qismi “a” bandida (juda koʻp miqdorda pora berishda ishtirokchilik) nazarda tutilgan jinoyatlarni sodir etganlikda aybli deb topilgan. Unga 3 yil muddatga prokuratura organlari tizimida ishlash huquqidan mahrum qilgan holda 15 yil muddatga ozodlikdan mahrum qilish jazosi tayinlangan. 

Shuningdek, sud hukmi bilan N.N. 11 yil, xavfli retsidivist hisoblangan Z.A.ga 12 yil muddatga ozodlikdan mahrum qilish jazosi berilgan.