“Demokrat.uz” rahbari va blogerga nisbatan jinoyat ishi qoʻzgʻatildi

Toshkent shahar IIBB huzuridagi Tergov boshqarmasi tomonidan “Demokrat.uz” internet nashri rahbari Mehmonov Fazlidinxon Asatilloxon oʻgʻli hamda bloger Gʻoipnazarov Aziz Abdulla oʻgʻliga nisbatan Oʻzbekiston Respublikasi Jinoyat kodeksining 165-moddasi 3-qismi “a” bandi (tovlamachilik) bilan jinoyat ishi qoʻzgʻatildi.

Tergov maʼlumotlariga koʻra, 2025 yil 15 dekabr kuni Gʻoipnazarov Sergeli tumanidagi avtosalonlardan biri faoliyatini obroʻsizlantiruvchi videomaterial tayyorlab, internet tarmoqlarida joylashtirgan.

Shundan soʻng, Mehmonov va Gʻoipnazarov ushbu videolavhani ijtimoiy tarmoqlardan oʻchirish, shuningdek, tadbirkorni obroʻsizlantiruvchi boshqa videomaterialni OAVda eʼlon qilmaslik evaziga jabrlanuvchidan tovlamachilik yoʻli bilan jami 50 ming AQSh dollari talab qilgani aytilmoqda.

Maʼlum qilinishicha, Mehmonov 29 yanvar kuni jabrlanuvchidan 3 ming AQSh dollari olgan. 10 fevral kuni esa 17 ming AQSh dollarini olayotgan vaqtda daliliy ashyolar bilan qoʻlga olingan.

Huquqni muhofaza qiluvchi organlar ushbu shaxslarning harakatlaridan jabr koʻrgan fuqarolarni eng yaqin ichki ishlar organlariga yoki 102 qisqa raqamiga murojaat qilishga chaqirmoqda.

Hozirda tergov harakatlari davom etmoqda.