Taftish.uz tahririyati xodimlariga hukm chiqarildi

O'zbekiston Respublikasi Harbiy sudi Taftish.uz tahririyati xodimlari va sobiq xodimlariga oid jinoyat ishi bo'yicha hukm chiqardi. Sud majlisi yopiq tartibda o'tkazilgan.

Huquq himoyachisi Abdurahmon Tashanovning xabar berishicha, tahririyat rahbari G'ayrat Aberayev 10 yil 6 oyga, jurnalist Marjona Eshquvvatova esa 4 yil 1 oyga ozodlikdan mahrum qilingan. Ishdagi yana ikki nafar vakil, shuningdek DXHning sobiq xodimlariga ham 10 yildan ortiq muddatlarga ozodlikdan mahrum qilish jazosi tayinlangan. Tashanovning bildirishicha, hukmga ko'ra mahkumlar jazoni umumiy tartibdagi koloniyalarda o'taydi.

Sudlanuvchilarga Jinoyat kodeksining 139-moddasi — tuhmat, 165-moddasi — tovlamachilik, 168-moddasi — firibgarlik hamda 244⁶-moddasi — yolg'on axborot tarqatish bo'yicha ayblovlar qo'yilgan. Qaysi shaxs qaysi ayblov bo'yicha aybdor deb topilgani haqida batafsil ma'lumot keltirilmagan.

Ish 2026 yil yanvar oyida boshlangan. O'sha paytda Toshkent shahar IIBB Taftish.uz bilan bog'liq besh nafar shaxs — G'ayrat Aberayev, Azizjon Yuldashev, Sardor Xamidov, Marjona Eshquvvatova va Dilshod Nishonov protsessual tartibda ushlanganini ma'lum qilgan edi. O'shanda ularga nisbatan tovlamachilik va firibgarlik bo'yicha gumonlar ilgari surilgan, shuningdek tuhmat va yolg'on axborot tarqatish bilan bog'liq holatlar tekshirilayotgani aytilgan edi.

Ichki ishlar vazirligi keyinchalik Taftish.uz nomidan tayyorlangan ayrim materiallar orqali fuqarolar va tadbirkorlarning sha'ni va obro'siga zarar yetkazish bilan tahdid qilinib, materiallarni olib tashlash evaziga pul talab qilingani da'vo qilgan va bu harakatlarni jinoiy guruh faoliyati sifatida baholagan.

Taftish.uz esa hibslar ortidan o'z faoliyatini davom ettirishini bildirgan.