“Dom”larga tutash hududlarda 1 ming 306 ta noqonuniy qurilmalar aniqlangan

Bu holatlar esa fuqarolarning noroziligiga, haqli eʼtirozlariga sabab boʻlmoqda. 

Shu yilning olti oyi davomida oʻtkazilgan oʻrganishlar natijasida Toshkent viloyatida 274, Toshkent shahrida 219, Fargʻona viloyatida 186, Qoraqalpogʻiston Respublikasida 91, Xorazm viloyatida 89, Buxoro viloyatida 65 ta va qolgan viloyatlarda ham 300 ga yaqin koʻp kvartirali uylarga tutash yer uchastkalarida jami 1 ming 306 ta noqonuniy qurilmalarni qurish holatlari aniqlangan. 

Ularning 519 tasi bartaraf etilgan boʻlsa-da, qolgan holatlarga ham toʻliq yechim topish lozim.

Shu bilan birga, koʻp kvartirali uylar hududidagi umumiy foydalanishda boʻlgan joylarning oʻzboshimchalik bilan egallab olinishi bilan bogʻliq Andijon viloyatida 95, Toshkent viloyatida 79, Toshkent shahrida 54, Buxoro viloyatida 31 ta va qolgan viloyatlarni hisoblaganda jami 368 ta holat aniqlangan.

Shu kabi holatlardan kelib chiqib, parlament quyi palatasining majlisida koʻp kvartirali uylarga tutash hududlardagi yashil maydonlar, bolalar oʻyingohlari va sport maydonchalarini joy mulkdorlari, boshqaruv servis kompaniyalari tomonidan saqlash va doimiy obodonlashtirib borish, ularning tutash hududlari noqonuniy egallab olinishining oldini olish boʻyicha amalga oshirilayotgan ishlar yuzasidan asoslantirilgan tushuntirishlar berish boʻyicha qurilish va uy-joy kommunal xoʻjaligi vaziriga parlament soʻrovi yuborildi.