Endi tank, samolyot va askarlar soniga tayanib gʻalabaga erishib boʻlmaydi — Prezident

13 yanvar kuni Oʻzbekiston prezidenti, Qurolli kuchlar Oliy bosh qoʻmondoni Shavkat Mirziyoyev raisligida Xavfsizlik kengashining kengaytirilgan yigʻilishi oʻtkazildi. Yigʻilishda mamlakat harbiy xavfsizligi, mudofaa qobiliyatini yanada kuchaytirish va zamonaviy tahdidlarga tayyorgarlik masalalari muhokama qilindi.

Tadbirda Xavfsizlik kengashi aʼzolari, Vazirlar Mahkamasi, kuch tuzilmalari rahbarlari, harbiy okruglar qoʻmondonlari hamda tegishli idora va jamoat tashkilotlari vakillari ishtirok etdi.

Prezident soʻnggi yillarda milliy armiyani rivojlantirish, uni zamonaviy qurol-yarogʻ va texnika bilan taʼminlash, harbiy xizmatchilarning jangovar hamda maʼnaviy tayyorgarligini oshirish borasida salmoqli ishlar amalga oshirilganini taʼkidladi. 

Xususan, armiyani raqamlashtirish, uchuvchisiz apparatlar boʻlinmalarini tashkil etish, harbiy taʼlim tizimini yangilash va sunʼiy intellektga asoslangan oʻqitish texnologiyalarini joriy etish natijasida samaradorlik sezilarli oshgani qayd etildi.

Yigʻilishda xalqaro va mintaqaviy vaziyat tahlil qilinib, zamonaviy urush shakllari tubdan oʻzgargani taʼkidlandi.

«Endi faqat tank, samolyot yoki askarlar soniga tayanish bilan gʻalabaga erishib boʻlmaydi. Bugungi janglar sunʼiy intellekt, raqamli boshqaruv, kiber va robot texnologiyalari, yuqori aniqlikdagi zarbalar hamda siyosiy-iqtisodiy bosim orqali olib borilmoqda», — dedi Prezident.

Shu munosabat bilan barcha sohalar xavf-xatarlarga oldindan javob berishga qaratilgan «proaktiv ish rejimi»ga oʻtishi zarurligi taʼkidlandi.

Prezident harbiy kadrlar tayyorlash tizimini yanada takomillashtirishga alohida eʼtibor qaratdi. Muddatli harbiy xizmatni yoshlar uchun nafaqat harbiy, balki kasbiy va ijtimoiy tayyorgarlik bosqichiga aylantirish rejalashtirilmoqda. Armiyada xizmat qilayotgan yoshlarni kasbga oʻqitish, IT va sunʼiy intellekt dasturlari boʻyicha tayyorlash, oliy taʼlimga kirish uchun imkoniyatlar yaratish belgilandi.

Shuningdek, harbiy xizmatchilar va ularning oila aʼzolarini ijtimoiy himoya qilish choralari eʼlon qilindi. 1 apreldan boshlab ofitserlar uchun koʻp yillik xizmat ustamalari ikki barobar oshiriladi, kontrakt asosida xizmat qilayotgan askar va serjantlar maoshi 10 foizga koʻtariladi. Uzoq yil xizmat qilgan harbiylar uchun pensiya hisoblash tartibi ham yaxshilanadi.

Yigʻilishda sakkiz yil oldin qabul qilingan Mudofaa doktrinasi va 1997 yildagi Milliy xavfsizlik konsepsiyasini zamonaviy tahdidlardan kelib chiqqan holda qayta koʻrib chiqish zarurligi qayd etildi. Yangi doktrina Oʻzbekistonning harbiy bloklarga qoʻshilmaslik siyosati, texnologik yangilanish va mintaqaviy barqarorlikni taʼminlashga xizmat qilishi lozimligi taʼkidlandi.

Yigʻilish yakunida Prezident barcha harbiy xizmatchilarni Qurolli Kuchlar tashkil etilganining 34 yilligi va Vatan himoyachilari kuni bilan tabrikladi.