Fargʻonada IIB xodimlari maktab direktorini kaltaklab, yolgʻon guvohlik berishga majburladi

Fargʻona viloyati Furqat tumanida IIB xodimlari maktab direktori, 34 yoshli Guliraʼno Qosimovani yechintirib, doʻpposlashgan soʻngra yolgʻon ariza yozib berishga majburlangan. Bu haqda Kun.uz xabar qildi (videoni tomosha qilish).

2025 yil 17 aprel kuni direktor oʻzining tanishi, Furqat tumani soliq inspeksiyasi boshligʻi Qurbonali Abdurahmonovdan YTHga uchragan turmush oʻrtogʻini davolatish uchun qarz soʻrashga boradi. Oʻsha paytda bir guruh IIB tezkor xodimlari toʻsatdan paydo boʻlib, direktor va amaldorni qip-yalangʻoch qilib yechintirgan holda doʻpposlay ketishgan.

Ayolning qayd etishicha, u tuman IIB sobiq boshligʻi Akmal Xoʻjayev bilan tuman soliq inspeksiyasi boshligʻi Qurbonali Abdurahmonov oʻrtasidagi mojaro qurboni boʻlgan. 

Qosimova ushbu voqealardan soʻng oʻz joniga qasd qilishga uringan.

Foto: Kun.uz

«Boshimdan oʻtgan voqealar ruhiyatimga qattiq taʼsir koʻrsatdi. Oilaliman, turmush oʻrtogʻim, 3 nafar farzandim, qaynota va qaynonam oldida, umuman olganda butun tumanda yomonotliq boʻldim. Garchi tuhmat qurboni boʻlgan boʻlsam-da odamlar buni tushunmasdi. Uyat boʻlsa ham qaynona va qaynonamga boshimdan oʻtgan voqealarni gavdalantirish, bu ishlar aslida tuhmat ekaniga ishontirish uchun kiyimlarimni yechib, kaltak zarbidan koʻkarib ketgan tanamgacha koʻrsatdim. Baribir boʻlmadi, oʻz jonimga qasd qildim. Lekin shifokorlar hayotimni saqlab qolishdi», — deydi u.

Nashrning qayd etishicha, Furqat tuman IIB boshligʻi Akmal Xoʻjayev voqeadan soʻng egallab turgan lavozimidan ozod etilgan. Unga nisbatan jinoyat ishi qoʻzgʻatilib, tergov harakatlari olib borilgan.

Akmal Xoʻjayev

Akmal Xoʻjayevga Jinoyat kodeksining 141−1-moddasi (Shaxsiy hayot daxlsizligini buzish) 2-qismi «a, b» bandlari, 141−3-moddasi (Shaxsning shaʼnini va qadr-qimmatini kamsituvchi hamda inson hayotining sir tutiladigan tomonlarini aks ettiruvchi maʼlumotlarni oshkor qilish) 2-qismi «b» bandi, 142-moddasi (Fuqarolarning turar joyi daxlsizligini buzish), 206-moddasi (Hokimiyat yoki mansab vakolati doirasidan chetga chiqish) 1-qismi hamda 230−2-moddasi (Tezkor-qidiruv faoliyati natijalarini soxtalashtirish) 1-qismi bilan ayblov eʼlon qilingan.

Guliraʼno Qosimova tuman IIB boshligʻi qoʻlga olingan boʻlsada, uni yechintirib kaltaklagan xodimlar esa ozodlikda yurganini qayd etgan.

«Meni urib tahqirlagan tezkor qidiruv xodimlari Sohib, Tohir, Yusuf, Aʼzam va Dilshod edi. Sohib, Yusuf, keyin bir oʻrinbosar bizni sʼyomka qilgandi. U yerda bolalar inspektori ham bor edi. Uch nafar profilaktika inspektori, uch nafar tezkor qidiruv xodimi, bir nafar terrorizmning boshligʻi Gʻayrat ismli bola ham boʻlgan», — deydi ayol.

Uning qayd etishicha, bu voqealardan keyin IIB boshligʻi Xoʻjayev ishdan ketgan, oʻrinbosariga ayblov eʼlon qilingan. Sud boʻlishi kutilyapti. Soliq idorasining boshligʻi aybi yoʻqligi uchun ishiga tiklangan.

«Endilikda esa Jasur ismli oʻrinbosar ishni bosti-bosti qilish uchun tanishlari orqali 50 ming dollargacha pul taklif qilyapti. Akmal Xoʻjayev va Jasur Rasulov dastlab ehtiyot chorasi sifatida qamoqqa olingandi, lekin 15 mln soʻm garov evaziga qoʻyib yuborilgan», — deydi ayol.

Guliraʼno uni tahqirlab, doʻpposlagan «operatsiya»da qatnashgan barcha xodimlarga qonun doirasida qatʼiy chora koʻrilishini istaydi. Shuningdek, u hozirda oilasi va oʻziga bosimlar boʻlayotgani, uni turli avtomobillarda kuzatishayotganini maʼlum qilgan.

Fargʻona viloyati prokuraturasi nashrga maʼlum qilishicha, holat boʻyicha prokuratura tomonidan tergov harakatlari oʻtkazilib, sobiq IIB boshligʻi va masʼul shaxslar boʻyicha ayblov ishi mazmunan koʻrish uchun sudga yuborilgan.

Holat yuzasidan hozircha Oʻzbekiston Ichki ishlar vazirligi rasmiy bayonot bergani yoʻq. Hodisa jamoatchilikning qizgʻin muhokamalariga sabab boʻlmoqda.