Bolalar maydonchasi oʻrniga "dom" qurilmoqda

Eng qiziq joyi shundagi qurilish boshlangan maydonda qoʻshni domning kanalizatsiya va gaz tarmogʻi joylashgan. 

Mahalliy aholi Anvarjon Qodirovning aytishicha, qilinayotgan mazkur ishlar qurilish talabiga umuman javob bermaydi. "Dom" tagidan esa kotlovan qazishga tushgan, ularning dardini eshitadigan tashkilot yoʻq. 

Garchi mazkur qurilish joyiga Prokuror yordamchisi kelib aholiga hammasini hal qilamiz, deyishiga qaramasdan hech nima oʻzgarmagan. Quruvchilar yana bilganini qilishmoqda.

"Quruvchilar kelib, qoʻlimizda hujjatimiz bor, qarorimiz joyida deydi. Kadastr boshliqlari ham negadir quruvchi tomonda. Qarshilik qilsak bizga pul taklif qilishyapti",  degan Anvarjon Qodirov.

Boshqa bir fuqaro Luiza Kapadezining aytishicha, mahalliy aholining qarshilik qilganini koʻrib quruvchi "obonchi"larni ularga qarshi harakatga keltirgan. Mahalla, prokuratura, arxitektura barcha tashkilotlarning quruvchiga gapi oʻtmayapti.   

Fuqaro Syuzanna Xolmirzayevaning aytishicha, quruvchi koʻcha ayollarini olib kelib, qayerda ishlashlarini surishtirib, ularga nisbatan tahdidga oʻtishgan.

Pul olmadilaringizmi, endi boshqachasiga gaplashamiz, deya. Qayerda ishlaysan, nima qilishni bilamiz, har qadamingni oʻylab bosinglar deyishdi. Qoʻlimizdan hech narsa kelmayapti. Boshimiz qotgan,  degan Syuzanna Xolmirzayeva.

Mahalliy aholi Raʼno Shokirovaning aytishicha,  fuqarolar tadbirkorga bolalarimiz qayerda oʻynaydi deb savol berishsa,  tadbirkor bu yerda oʻynatma bolangni, men uy quraman deb javob bergan.

"Asfaltlarimizni buzib oʻtib ketishdi. Endi qayta qilishimiz kerak. Bizga birortasi kelib yordam bermaydi. Mahalla fondimiz bor, shundan qayta asfalt qilamiz-da endi. Tadbirkor kelib, shu yerga uy qurmoqchi. 

Mana bugun kelib qurilishini boshlashdi, kotlovan qazishni boshlaganda uylarimiz "zirillab" ketdi. Domning yonida kanalizatsiya bor, ustini kovlab tashlashdi. U yerdan gaz quvuri ham oʻtgan. Gazni ham, kanalizatsiyani ham hisobga olmayapti. Bolalar qayerda oʻynashadi endi desak, bu yerda oʻynatma bolangni, uy quraman-da deyapti. 

Hokimiyatdan kelgan vakillarga tushuntirdik, quruvchiga tushuntirdik, lekin ular biz tanimaydigan, umuman boshqa koʻchadagi koʻcha bolalarini, barzangi ayollarini olib kelib, bizga bosim oʻtkazishni boshlashdi. Xohlagan joyingga murojaat qil, biz bu yerga baribir dom quramiz deyapti",  degan Raʼno Shokirova.

Mazkur hududga kelgan Fargʻona viloyati qurilish va uy-joy komunal xoʻjaligi bosh boshqarmasi bosh mutaxassisi Bunyod Xamraliyev ushbu nizoli hudud hozirda oʻrganilayotganligini aytdi. 

Unga koʻra, qurilishga oid huquqiy hujjatlar oʻrganilib chiqilgunga qadar dom qurilib boʻlgan. Hozirda rasmiylashtirilgan barcha hujjatlar huquqiy holati qayta oʻrganilib chiqilayotganini maʼlum qildi. 

Fargʻona shahar qurilish va uy-joy kommunal xoʻjaligi boʻlimi boshligʻi Bekzod Mahmudovning maʼlum qilishicha, qurilish nazorat inspeksiyasi tomonidan jamoatchilik ekspertizasidan shaffof holatda oʻtish toʻgʻrisida qayta ogohlantirish xati berilib, qurilish ishlari vaqtincha toʻxtatilgan.