Fargʻonada ikki kishi YTH qurboni boʻldi

Yoʻl-transport hodisasi Furqat tumanidan oʻtuvchi "Paxtaobod – Qolgandaryo" avtomobil yoʻlida sodir boʻlgan. Shu yoʻl boʻylab harakatlanib kelayotgan "Cobalt" mashinasi haydovchisi atrofni tuman qoplagan boʻlishiga qaramay, qarama-qarshi yoʻnalishga chiqib harakatlangan. 

Ayni shu vaqtda "Cobalt"ning roʻparasidan kelayotgan "Damas" uni payqamay qolishi ortidan yoʻl-transport hodisasi sodir boʻlgan. Oqibatda "Damas" haydovchisi voqea joyida halok boʻlgan. Mashina ichida boʻlgan haydovchining turmush oʻrtogʻi esa shifoxonada vafot etgan. 

Yuqoridagi YTH yuzasidan "Cobalt" haydovchisiga nisbatan Jinoyat kodeksining 266-moddasi 3-qismi "a" bandi (transport vositalari harakati yoki ulardan foydalanish vaqtidagi xavfsizlik qoidalarini buzish odamlar oʻlimiga sabab boʻlsa, muayyan huquqdan mahrum qilinib, oʻn yilgacha ozodlikdan mahrum qilish bilan jazolanadi) bilan ish ochilgan. 

Yoʻl-transport hodisasiga sababchi qilib koʻrsatilayotgan "Cobalt" haydovchisiga nisbatan oʻqilgan sud hukmiga koʻra, fuqaro 3 yil muddatga haydovchilik huquqidan hamda 3 yilga ozodlikdan mahrum qilingan. Sudlanuvchi sud zalidan qamoqqa olingan. Unga tayinlangan jazoni tartibli koloniyada oʻtashi belgilangan. 

Eslatib oʻtamiz, joriy yilning 14 oktabr kuni ham Qashqadaryo viloyatida "Nexia-1" hamda "Gentra" avtomashinalari toʻqnashishi ortidan haydovchi vafot etgan edi.