Guliston shahriga yangi avtobuslar olib kelindi

Prezident Guliston shahri jamoat transporti infratuzilmasini takomillashtirish maqsadida olib kelingan zamonaviy avtobuslar taqdimoti bilan tanishdi.

Har biri 65 nafar yoʻlovchisni qulay sharoitlarda manziliga yetkazishga moʻljallangan ushbu avtobuslar past polli boʻlib, nogironligi boʻlgan shaxslar uchun maxsus pandus uskunalari va alohida oʻrindiqlar bilan jihozlangan. Yoʻl haqi toʻlovlarini elektron tarzda amalga oshirish uchun “ATTO” tizimi oʻrnatilgan.

Aholining jamoat transportiga boʻlgan ehtiyoji hisobga olinib, avtobuslar harakati Guliston shahrining 23 ta mahallasiga xizmat koʻrsatuvchi 7 ta shahar ichki yoʻnalishida brutto-shartnoma asosida yoʻlga qoʻyiladi.

Natijada avtobuslar harakat intervali avvalgisiga nisbatan 2 barobarga qisqaradi, kuniga 29 ming nafar aholiga qulay, xavfsiz va arzon transport xizmatlari koʻrsatilishi taʼminlanadi.

Yana bir muhim jihat: mazkur qatnovlar orqali yiliga 38 milliard soʻmdan ziyod transport xizmatlari koʻrsatiladi, 120 ta ish oʻrni yaratiladi.

Davlat rahbari mutasaddilarga mamlakatdagi barcha shaharlarning jamoat transporti parklarini shunday zamonaviy avtobuslar bilan toʻldirish ishlarini izchil davom ettirish, fuqarolarga sifatli xizmat koʻrsatish boʻyicha koʻrsatmalar berdi.

Shu yerda kelgusida 11 metrli, uzoq masofaga moʻljallangan yana 30 ta avtobusni olib kelish rejasi haqida ham maʼlumot berildi. Loyiha amalga oshirilsa, qoʻshimcha 150 dan ortiq ish oʻrni yaratiladi.