"Kvadrober"larning ota-onalari jarimaga tortiladi — IIV

Qayd etilishicha, tarmoqlarda yoshlar oʻrtasida oʻzini maʼlum bir hayvon qiyofasini aks ettiruvchi aksessuarlardan foydalangan holda oʻsha jonzotning xatti-harakatlariga taqlid qilish koʻrinishidagi "kvadroberlik submadaniyat" shakllangan. Avvalroq bu holat Qozogʻiston, Rossiya va Ukraina yoshlari orasida kuzatilgan. Endi esa Toshkent shahrida ham uchramoqda. 

Joriy yilning 10 oktabr kuni poytaxt koʻchalarining birida hayvon qiyofasidagi niqobni taqib olgan “kvadrober” bola kuzatilgan. 11 oktabrda esa yana bir “kvadrober” itga taqlid qilib yosh bolaga hujum qilgan, voqeaga guvoh boʻlgan bola qattiq qoʻrqib ketganligi haqida IIB xodimlariga xabar bergan. 

Soʻng yuqoridagi holat ekspertlar tomonidan oʻrganilgan. Ularga koʻra, bunday holatlar bolalarda hayvonlarning agressiv harakatlarini qabul qilishiga, oʻzini va atrofdagilarni jarohatlashiga, hali toʻla shakllanmagan psixikasiga zarar yetishiga hamda uning jamiyatdan ajratilib qolishiga olib kelishi mumkin. 

Ishki ishlar vazirligi qayd etilgan yoshlarning mazkur xatti-harakatlarini toʻxtatish, yaʼni bolalarning maʼmuriy huquqbuzarlik sodir etishini oldini olish maqsadida hayvonga taqlid qilib, uni oʻzida shakllantirmoqchi boʻlgan bolalarning ota-onasiga jarima belgiladi. 

"Maʼmuriy javobgarlik toʻgʻrisidagi kodeksga muvofiq, ota-onalar yoki ularning oʻrnini bosuvchi shaxslar tomonidan voyaga yetmagan bolalarni tarbiyalash va ularga taʼlim berish borasidagi majburiyatlarni bajarmaslik, shu jumladan voyaga yetmagan bolalarning maʼmuriy huquqbuzarlik sodir etishiga olib kelishi BHMning 5 barobarigacha (1 million 875 ming soʻmgacha) jarimaga tortishga sabab boʻladi", deyiladi vazirlik xabarida.

Bundan tashqari, vazirlik bola huquqlari kafolatlarini taʼminlashga masʼul organlardan biri sifatida shunday "submadaniyat" namoyon boʻlishi holatlari ota-onalar tomonidan oʻz majburiyatlarini bajarmaslik sifatida baholanishini maʼlum qilgan.