Rossiyada migrantlar geolokatsiyasi kuzatilishi uchun maxsus smartfon sotib olishga majburlanishi mumkin

Rossiya IIV vaziri o‘rinbosari Igor Zubovning so‘zlariga ko‘ra, kelgusida mamlakatga uzoq muddatli mehnat faoliyati uchun keladigan har bir chet ellik fuqaro elektron profili o‘rnatilgan mobil qurilma sotib olishi shart bo‘ladi. Ushbu qurilma migrantning mamlakatda bo‘lishini kuzatish tizimining tarkibiy qismiga aylanadi — unda yaratilgan elektron profil orqali politsiya har bir kishining qayerda ekanligidan doimo xabardor bo‘lib turadi.

Zubovning ta’kidlashicha, tizim migrantlarga foyda ham keltiradi: masalan, telefon orqali hujjatlar muddati tugayotgani yoki ma’lum bir joyga borish zarurati haqida oldindan ogohlantirish mumkin bo‘ladi.

Eslatib o‘tamiz, hozirda Rossiya IIV shaxsning joylashuvini kuzatish imkonini beruvchi «Amina» deb nomlangan mobil ilovani sinovdan o‘tkazmoqda. Ushbu ilovada telefon 3 kundan ortiq vaqt davomida geopozitsiyani uzatmay "jim bo‘lib qolsa", migrant avtomatik tarzda migratsiya ro‘yxatidan chiqarib tashlanadi.