O‘zbekiston aholisi soni 39 milliondan oshdi

Ro‘yxatga olish natijalariga ko‘ra, O‘zbekiston aholisi soni 39 mln nafardan oshdi. Bu haqda statistika qo‘mitasi xabar berdi.

Aholi va qishloq xo‘jaligini ro‘yxatga olish tadbirining dastlabki natijalariga bag‘ishlangan matbuot anjumanida ma’lum qilinishicha, ro‘yxatga olishning dastlabki natijalariga ko‘ra, O‘zbekiston aholisi soni 39 047 321 nafarni tashkil etdi.

Joriy statistik hisob-kitoblar bo‘yicha ushbu ko‘rsatkich 38 236 704 nafar edi. Farq 810,6 ming nafarni tashkil qildi.

Shuningdek, aholi soni 1989-yildagi ro‘yxatga olish natijalariga nisbatan 2 barobarga oshgani ma’lum qilindi.

Ro‘yxatga olingan xorijiy fuqarolar soni

O‘zbekiston hududida 1-yildan ortiq muddat istiqomat qilayotgan 56 860 nafar xorijiy fuqaro ro‘yxatga olingan.

Shundan 19 300 nafari Toshkent shahrida istiqomat qilmoqda.

Ro‘yxatga olingan xorijiy fuqarolar davlatlar kesimida:

Hindiston — 13 312 nafar;

Rossiya Federatsiyasi — 10 826 nafar;

Qozog‘iston — 9 425 nafar;

Tojikiston — 5 722 nafar;

Turkmaniston — 5 347 nafar;

Qirg‘iziston — 4 397 nafar;

Pokiston — 1 433 nafar;

Xitoy — 1 031 nafar;

Turkiya — 811 nafar;

Koreya Respublikasi — 691 nafar;

Boshqa davlatlar — 3 865 nafar.

Ro‘yxatga olishda aholining 97,3 foizi qamrab olindi.

Aholining 2,7 foizi esa turli sabablarga ko‘ra ro‘yxatga olish jarayonlarida ishtirok etmagan.

Bir nafar aholini ro‘yxatga olish xarajati

Dastlabki hisob-kitoblarga ko‘ra, bir nafar aholini ro‘yxatga olish uchun sarflangan xarajat 0,12 AQSH dollarini tashkil etgan.