Oʻzbekiston nima sababdan «Tinchlik kengashi»ga qoʻshildi?

Prezident maslahatchisi, sobiq tashqi ishlar vaziri Abdulaziz Komilov Oʻzbekistonning «Tinchlik kengashi»ga aʼzo boʻlishiga nima sabab boʻlgani hamda ushbu tashabbusdan koʻzlanayotgan maqsad va manfaatlar haqida izoh berdi.

Uning taʼkidlashicha, Oʻzbekiston ushbu tashabbusni qoʻllab-quvvatlashga qaror qilgan, chunki Yaqin Sharqdagi vaziyat mamlakat xavfsizligiga bevosita taʼsir koʻrsatadi. Shu bois bu borada xalqaro hamkorlik muhim ahamiyat kasb etadi.

Komilovning soʻzlariga koʻra, «Tinchlik kengashi» tashabbusi Oʻzbekiston tashqi siyosatining asosiy ustuvor yoʻnalishlari — tinchlik, barqarorlik va mintaqaviy xavfsizlikni mustahkamlash tamoyillariga toʻliq mos keladi. Shuningdek, Yaqin Sharq mintaqasida Oʻzbekistonning muhim strategik manfaatlari mavjud.

Prezident maslahatchisi bir necha yil avval Yaqin Sharqqa ketib, turli ekstremistik guruhlar safiga qoʻshilgan, keyinchalik esa Oʻzbekistonga qaytarilgan fuqarolar masalasiga ham toʻxtalib oʻtdi. Uning aytishicha, ushbu shaxslar vatanga qaytarilgandan soʻng, ularni jamiyatga qayta moslashtirish va ijtimoiy hayotga integratsiya qilish uchun zarur sharoitlar yaratilgan.

«Bu boradagi insonparvarlik siyosati Birlashgan Millatlar Tashkiloti rahbariyati tomonidan yuqori baholandi. Ularning fikricha, Prezidentimiz olib borayotgan siyosat koʻplab davlatlar uchun namuna boʻlishi mumkin. Bu esa Oʻzbekistonning Yaqin Sharq mintaqasida boshqa davlatlar bilan oʻzaro manfaatdor ekanini va eng avvalo, oʻz xavfsizligini taʼminlashga intilayotganini koʻrsatadi», — dedi Komilov.

Shuningdek, u Yaqin Sharqdagi beqarorlikning Markaziy Osiyo xavfsizligiga taʼsiri haqida gapirar ekan, Afgʻonistonda urush boshlanishidan avval ekstremistik guruhlar deyarli mavjud boʻlmaganini, keyinchalik esa ularning asosan Yaqin Sharqdan kirib kelganini qayd etdi.

Komilovning fikricha, mintaqadagi muammolarni hal etish murakkab va uzoq davom etadigan jarayon boʻlib, bunda xalqaro hamjamiyatning birlashgan harakati zarur.

«Faqatgina AQSh emas, balki arab davlatlari, musulmon mamlakatlari va Markaziy Osiyo davlatlari birgalikda harakat qilishi kerak. Har bir qadam puxta oʻylab tashlansa, tinchlik va barqarorlikni taʼminlash yoʻlida muhim natijalarga erishish mumkin. Oʻzbekiston xalqaro hamjamiyat bilan hamkorlikni izchil davom ettiradi», — dedi prezident maslahatchisi.