Oʻzbekistonliklarni bortga chiqarmay kamsitgan WizzAir haqida kanadalik xonanda qoʻshiq kuyladi

Bloger Shahnoza Soatovaning yozishicha, kanadalik mashhur qoʻshiqchi Devid Keroll  2008 yili “United airlines” aviakompaniyasi qimmat ($3500) gitarasini sindirib, tovon toʻlab bermagani uchun bu haqda qoʻshiq yozib, “Yutub”ga chiqargan va kompaniyaning 180 million dollar zarar koʻrishiga sababchi boʻl. Uning ushbu ishi bilan jahon aviatsiyasida mijozlar bilan ishlash strategiyasining tubdan oʻzgarishiga sababchi boʻlgan.

Ushbu xonanda bu safar yurtdoshimiz, kosonsoylik Suhrob Ubaydullayev va uning WizzAir aviakompaniyasi bilan mojarosi haqida qoʻshiq kuyladi.

Suhrobni 2023 yil avgustida Rimdagi aeroportda WizzAir kompaniyasi samolyot bortiga chiqarmagan — shunchaki oʻzbekistonlik boʻlgani uchun! Natijada Abu Dabi orqali tranzit bilan uchayotgan talabaning chiptalari kuyib ketgan, bir hafta yurtma-yurt sarson boʻlib, qarzga botib, arang uyiga yetib kelgan. 

Aviakompaniya oʻzbekistonlik yigitni bortga besabab chiqarmagani yetmagandek, pulini ham qaytarib bermagan. 

“Bu bedodlikka chek qoʻyish kerak”, – deb yozadi Shahnoza Soatova. Uning qoʻshimcha qilishicha, Suhrob Wizzair’ni Yevropa sudiga bergan. Devid Keroll esa uni qoʻllab qoʻshiq yozibdi va klip suratga olgan. 

Wizz Air — 2003 yilda taʼsis etilgan Vengriya loukasteri boʻlib, 50 dan ortiq davlatga, shu jumladan, Oʻzbekistonga parvozlarni amalga oshirgan. Arzon aviakompaniya joriy yil sentabridan Samarqand va Toshkentga parvozlarni bekor qildi. Soʻnggi yillarda yoʻlovchilar huquqlari, kechiktirilgan parvozlar va xizmat koʻrsatish standartlari boʻyicha kompaniya atrofida bir qator bahs va tanqidlar kuzatilgan.