Qoʻqonda 1 milliard 35 million soʻmlik pirotexnika vositasining noqonuniy aylanmasiga chek qoʻyildi

Bojxona organlari tomonidan huquqni muhofaza qiluvchi organlar bilan hamkorlikda pirotexnika vositalarining chetdan noqonuniy olib kirilishi, saqlanishi va aylanishiga tizimli ravishda qarshi kurash olib borilmoqda.

Jumladan, Fargʻona viloyati bojxona boshqarmasi Kontrabandaga qarshi kurashish boʻlimi xodimlari viloyat DXX va Milliy gvardiya xodimlari bilan hamkorlikda Qoʻqon shahrida pirotexnika vositalarining noqonuniy aylanmasini oldini olishga qaratilgan navbatdagi tezkor tadbir oʻtkazildi.

Tezkor tadbir davomida mazkur shahar hududida harakatlanayotgan fuqaro boshqaruvidagi “Damas” rusumli avtomashina tezkor kuzatuvga olinib, shahardagi yashash xonadonlarining birini oldiga yaqinlashgan vaqtida belgilangan tartibda toʻxtatilib koʻzdan kechirilganida avtomashina salonida xorijda ishlab chiqarilgan va bojxona rasmiylashtiruvidan oʻtganligini tasdiqlovchi hujjatlari boʻlmagan 16 dona qutilarda jami 900 donaga yaqin mushak pirotexnika vositalari borligi aniqlandi.

Shundan soʻng, haydovchining koʻrsatmasiga asosan tezkor tadbir davom ettirilib, avtomashina toʻxtatilgan xonadon ham belgilangan tartibda xolislar ishtirokida koʻzdan kechirildi. Natijada, yashash xonadoniga tutash boʻlgan qoʻshimcha yer maydoni hovlisida tegishli xorijda ishlab chiqarilgan va bojxona rasmiylashtiruvidan oʻtganligini tasdiqlovchi hujjatlari boʻlmagan, 50 dona qutilarda jami 2800 dona mushak pirotexnika vositalari borligi aniqlandi.

Oʻtkazilgan keng qamrovli tezkor tadbir davomida dastlabki qiymati 1 milliard 35 million soʻmlik jami 66 ta qutilarda 3700 donaga yaqin “7 SHOTS” nomli mushak pirotexnika vositalari holati boʻyicha tegishli tartibda protsessual hujjatlar rasmiylashtirilib, vaqtincha saqlovga olindi.

Hozirda mazkur holat yuzasidan tergovga qadar tekshiruv harakatlari olib borilmoqda.