Toshkent viloyatida yoʻl harakati qoidasini buzgan 10 nafar shaxs qamaldi

Qayd etilishicha, yuqoridagi holat Boʻstonliq tumanida kuzatilgan. 10 nafar yosh 6 ta avtomobilda guruh-guruh boʻlib harakatlanib, ushbu yoʻldan ketayotgan boshqa haydovchilarning harakatlanishiga xalaqit bergan. Bundan tashqari, videotasvirda mashina ichida boʻlgan shaxslarning avtomobil oynasidan tanasini chiqarib ketayotganini ham koʻrish mumkin. 

Ushbu holat tarmoqlarda tarqalganidan soʻng Boʻstonliq tumani yoʻl-harakati xavfsizligi xodimlari tomonidan oʻrganilgan. Surishtiruv davomida qoidabuzarlarning 5 ta transport vositasi Toshkent viloyatida, 1 ta transport vositasi esa Qashqadaryo viloyati hududida ekani aniqlanib, mazkur avtomobil haydovchilarining barchasiga maʼmuriy bayonnomalar rasmiylashtirilgan.

"Qolgan harakat ishtirokchilariga qoʻshilib men ham "avarenka"ni yoqib, sekin guruh boʻlib harakatlanganman. Qilgan aybimni tan olaman, bunday holatlar boshqa qaytarilmaydi. Ushbu beparvoligim oqibatida boshqa ishtirokchilarga xalaqit bergan boʻlsam, ulardan uzr soʻrayman", deydi qoidabuzarlardan biri.

Shuningdek, yoʻl harakati qoidalariga amal qilmagan boshqa bir oʻsmir esa tugʻilgan kuni boʻlgani sababli, shoʻxlik ortidan ushbu holat yuzaga kelganini bildirgan.

"Tugʻilgan kunim edi. Shu munosabat bilan oʻrtoqlarim va qarindoshlarim bilan Toshkent viloyati Boʻstonliq tumanida tugʻilgan kunimni nishonladik hamda ozgina shoʻxlik qilib qoʻydik. Katta trassalarda, koʻchalarda notoʻgʻri harakatlarni yuzaga keltirdik. Bir ogʻaynimiz videoga olgandi. Ijtimoiy tarmoqlardagi sahifasiga joylabdi. Biz bu video bunday tarqalib ketishini kutmagan edik. Qilgan ishimizdan afsusdamiz. Shaxsan men pushaymonman. Tengqurlarimdan bunday qoida buzarliklarni qilmasliklarini soʻrab qolaman. Qilgan ishimdan rosa pushaymonman", deydi bosha bir qoidabuzar.

Shundan soʻng ushbu fuqarolarning fikrlari bilan Boʻstonliq tumani ichki ishlar boshqarmasi xodimlari mazkur videoni tasvirga olgan yana bir qoidabuzarlarni ham aniqlanib, ularning harakatlariga huquqiy baho bergan.

"Olib borilgan surishtiruvlar davomida qoidabuzarlarning shaxslariga oydinlik kiritilib, holat yuzasidan bir nechta hujjatlar toʻplangan. Ushbu hujjatlar koʻrib chiqilishi uchun Jinoyat ishlari boʻyicha Boʻstonliq tumani sudiga joʻnatilgan. Ammo nomaʼlum sabablarga koʻra, sud majlisida tasvirga olishga ruxsat berilmadi", deyiladi manbada.

Soʻng 10 nafar qoidabuzarning ishi sudda koʻrib chiqilgan. Sud qarorida ularning 9 nafariga 10 sutka maʼmuriy qamoq jazosi belgilangan. Bir nafariga esa farzandi borligi uchun jarima jazosi qoʻllangan. Bundan tashqari, barcha qoidabuzarlarni yigʻib, profilaktik suhbatlar ham olib borilgan. Suhbat davomida ular bunday xatti-harakatlarni boshqa amalga oshirmaslikka chaqirilgan.