Toshkentda fuqarolar murojaatlarini qabul qilishda yangi tartib joriy etildi

 Bu haqda 27 yanvar kuni Prezident Shavkat Mirziyoyev ishtirokida oʻtkazilgan yigʻilishda maʼlum qilindi.

Yigʻilishda Chilonzor tumani misolida ichki ishlar organlari faoliyatida yangi yondashuvlar taqdim etildi. Unga koʻra, endilikda tuman ichki ishlar xodimlari oʻz xizmat yoʻnalishi va hududidan qatʼi nazar, fuqarolar murojaatlarini qabul qiladi. Koʻchada formali ichki ishlar xodimiga qilingan murojaat 102 xizmatiga berilgan xabar bilan tenglashtiriladi.

Shuningdek, Toshkent shahridagi 55 ta mahallada profilaktika inspektorlarining xizmat xonalari ular bilan tezkor aloqa oʻrnatish imkonini beruvchi maxsus tugmalar bilan jihozlanadi. Profilaktika inspektorlari qayerda boʻlishidan qatʼi nazar, aholi ular bilan qoʻl telefonlari va planshetlari orqali tun-u kun bogʻlanishi mumkin boʻladi.

Profilaktika inspektorlari uchun zamonaviy va xalqqa mos xizmat formasi joriy etiladi. Ularning ish faoliyati raqamlashtirilib, «ovozli tushuntirish xati» olish amaliyoti yoʻlga qoʻyiladi.

Bundan tashqari, tuman ichki ishlar tergov boʻlimlarida materiallarni koʻrib chiquvchi tergovga qadar tekshiruv guruhlari tashkil etiladi. Endi profilaktika inspektorlarining faoliyatini baholashda protokol tuzish asosiy mezon boʻlmaydi.

Yigʻilishda aholi huquqlarini himoya qilish va qulaylik yaratish maqsadida sudlar, advokatura hamda sud-tibbiy ekspertiza xizmatlari uchun markazlashgan tungi navbatchilik tizimini joriy etish boʻyicha xorijiy tajribani oʻrganish vazifasi belgilandi.

Qayd etilishicha, endilikda ichki ishlar organlari va Milliy gvardiya xodimlariga tungi xizmatning har bir soati uchun bazaviy hisoblash miqdorining 5 foizi miqdorida qoʻshimcha haq toʻlanadi. Shu bilan birga, aholi gavjum joylarda dronlar yordamida patrullik kuzatuvi amalga oshiriladi.

Shuningdek, huquqbuzarliklar profilaktikasiga oid qonunchilikni amalda ishlaydigan holatga keltirish va Maʼmuriy javobgarlik toʻgʻrisidagi kodeksni takomillashtirish rejalashtirilgan.

Toshkent shahrida xavfsiz muhitni shakllantirish maqsadida «poytaxt namunasi» joriy etiladi.