Toshkentda mast holatda operatsiya qilgan soxta jarrohlarga hukm oʻqildi

Toshkent shahri Chilonzor tuman sudida noqonuniy ravishda plastik jarrohlik amaliyotlarini oʻtkazib, fuqarolar sogʻligʻiga ogʻir zarar yetkazgan er-xotinga nisbatan sud hukmi eʼlon qilindi.

Maʼlum boʻlishicha, sudlanuvchilar tibbiy maʼlumotga ega boʻlmagan holda (erkak faqat maktabni tugatgan) koʻp qavatli uyning yertoʻlasida tashkil etilgan noqonuniy klinikada murakkab kosmetologik va jarrohlik amaliyotlarini amalga oshirib kelgan. Natijada bir necha ayollar ogʻir tan jarohati olgan, yuz sohasida deformatsiya kuzatilgan, ayrim holatlarda jabrlanuvchilar koma holatiga tushgan.

Jabrlanuvchilardan birining koʻrsatmasiga koʻra, operatsiya mast holatda boʻlgan erkak tomonidan oʻtkazilgan. Amaliyotdan soʻng ayol besh kun davomida komada boʻlgan, uning yuz nervlari shikastlanib, yuzining bir qismi falaj boʻlib qolgan.

Yana bir jabrlanuvchi sud majlisiga nogironlik aravasida kelgan. Uning aytishicha, soxta kosmetologlar xatosini tan olib, toʻlangan mablagʻning bir qismini (600 dollar) qaytargan, ammo yetkazilgan zarar qaytarib boʻlmas darajada boʻlgan.

Mutaxassislar xulosasiga koʻra, amaliyotlar vaqtida eng arzon va sifatsiz tibbiy materiallar qoʻllangan.

Tergov jarayonida maʼlum boʻlishicha, sudlanuvchi ayol bir necha bor ism-familiyasini oʻzgartirgan, soxta diplomlardan foydalangan hamda boshqalarga pul evaziga “taʼlim berib”, sertifikatlar tarqatgan. Vaqtinalik faoliyati toʻxtatilganiga qaramay, u yashirin ravishda 200–400 dollar evaziga mijoz qabul qilishni davom ettirgan.

Plastik jarroh Said Ahmedshinning taʼkidlashicha, kosmetolog faqat teri yuzasidagi muolajalarni bajarishi mumkin, ichki toʻqimalar, qon tomirlari va nervlar bilan ishlash esa faqat litsenziyaga ega professional jarrohlar vakolatiga kiradi.

Sud hukmiga koʻra, erkak Oʻzbekiston Respublikasi Jinoyat kodeksining 186-moddasi (xavfsizlik talablariga javob bermaydigan xizmatlar koʻrsatish) bilan aybdor deb topilib, 3 yil muddatga ozodlikdan mahrum etildi va sud zalidan hibsga olindi.

Ayol kishiga nisbatan, qaromogʻida ikki oylik chaqalogʻi borligi inobatga olinib, 3 yil muddatga ozodlikni cheklash jazosi tayinlandi.