Yangi Namanganda yangi IT-park qurilishi boshlandi

Shavkat Mirziyoyev Davlatobod tumanidagi Yangi Namangan shaharchasi hududida IT-park qurilishiga tamal toshi qo‘yish marosimida ishtirok etdi.

Namangan viloyati aholisining 1 million 600 mingdan ortig‘ini yoshlar tashkil etishi, bu juda katta ijtimoiy-iqtisodiy kapital ekanini ta’kidlandi.

Ekspertlar O‘zbekistonning sun’iy intellekt bo‘yicha salohiyatini 10 milliard dollarga baholamoqda.

So‘nggi yillarda Nukus, Qarshi, Termiz, Urganch va Farg‘ona shaharlarida zamonaviy IT-parklar ishga tushirildi. O‘tgan yili oktabrda poytaxtda IT-park loyihasining ikkinchi bosqichi boshlangan edi.

Xitoylik hamkorlar bilan 117 million dollarlik yirik loyiha asosida respublikaning 6 ta hududida IT-parklar quriladi:

• Yangi Namangan;
• Samarqand;
• Chirchiq;
• Nurafshon;
• Urganch;
• Navoiy shaharlarida.

Yangi Namangan shahrida barpo etiladigan majmua ushbu loyihaning ilk qaldirg‘ochi bo‘ladi.

Loyihaga muvofiq, 1,7 gektar maydonda 17 qavatli zamonaviy bino barpo etiladi. Bino xorijiy hamkorlar tomonidan loyihalash va qurilishdan tortib, ichki jihozlashgacha bo‘lgan barcha bosqichlarni qamrab olgan holda to‘liq tayyor holda foydalanishga topshiriladi.

Maydoni qariyb 18 ming kvadrat metr bo‘lgan ushbu zamonaviy majmuada ta’lim va eksport markazlari, kovorking va ofis maydonlari, startap akseleratori hamda xorijiy kompaniyalar uchun maxsus xizmat ko‘rsatish tizimi tashkil etiladi.

Bu yerda o‘nlab kompaniyalar va startap studiyalar yagona axborot texnologiyalari ekotizimi sifatida faoliyat yuritadi.

Majmuada namanganlik 2 mingga yaqin yoshlar uchun ish o‘rinlari yaratilish rejalashtirilgan.

Loyihaning ishga tushishi viloyatda AT xizmatlar yillik hajmini 500 milliard so‘mga, eksportni esa 30 million dollarga yetkazishga xizmat qiladi. 

Shavkat Mirziyoyev loyihani amalga oshirishda ishtirok etayotgan xorijiy hamkorlarga minnatdorlik bildirdi. Shundan so‘ng Prezident Yangi Namangan IT-parki qurilishiga tamal toshi qo‘ydi.