Oʻzbekistonda pensionerlariga noyabr oyida transport qatnovlariga chegirmalar beriladi

Oʻzbekistonda noyabr oyi davomida keksa yoshdagilar uchun aviaparvoz va temiryoʻl safarlariga maxsus chegirmalar amal qiladi.

Uzbekistan Airways 30 sentabrdan boshlab ichki yoʻnalishlarda iqtisodiy sinfda parvoz qiladigan yoʻlovchilar uchun 15 foizgacha chegirmalar taklif etmoqda. Aksiyadan 60 yoshdan katta erkaklar va 55 yoshdan katta ayollar foydalanishi mumkin. Chegirmalar 1–30 noyabr kunlari amal qiladi.

Aviachiptalarni Uzbekistan Airways Sales filiallari, mamlakatdagi agentliklar hamda uzairways.com sayti orqali xarid qilish mumkin. Shu bilan birga, chegirma faqat yoʻlovchi tashish tariflariga tatbiq etiladi, soliq va yigʻimlarga taalluqli emas.

«Oʻztemiryoʻlovchi» ham keksalar uchun aksiya eʼlon qildi. Jumladan, 2–8 oktabr va 1–30 noyabr kunlari mahalliy yoʻnalishlardagi barcha poyezdlarda (Afrosiyob yuqori tezlikli poyezdlari bundan mustasno) yoʻlkira narxining 20 foiz qismiga chegirma qoʻllaniladi.

Temir yoʻl chiptalarini eticket.railway.uz orqali onlayn tarzda yoki barcha kassalardan xarid qilish imkoniyati mavjud.

Avvalroq Oʻzbekistondagi barcha aeroportlarning ICAO (BMT muassasasi boʻlgan Xalqaro fuqaro aviatsiyasi tashkiloti) kodi oʻzgargani, UT kodi oʻrniga aeroportlarning Oʻzbekistonga tegishliligini anglatuvchi UZ kodi qoʻllanilishi haqida xabar bergan edik.