Oʻzbekistonda yangi xavfli virus tarqaldimi?

Qayd etilishicha, metapnevmovirus infeksiyasi birinchi marta 2001 yilda aniqlangan. Ushbu kasallik havo-tomchi yoʻli bilan, kamdan-kam holatlarda esa ifloslangan yuzalar bilan aloqa qilish orqali yuqadi. Virus asosan kuz-qish mavsumida yuzaga chiqadi. 

Metapnevmovirus infeksiyasi, odatda burun oqishi, yoʻtal va isitma kabi belgilar bilan oʻtkir respiratorli infeksiyalar shaklida namoyon boʻladi. Baʼzi hollarda bronxiolit hamda pnevmoniyani keltirib chiqaradi. Metapnevmovirus infeksiyasi bilan kasallangan odamlarning aksariyati asoratlarsiz tuzalib ketadi. 

Bugungi kunda mazkur virus butun dunyoda keng tarqalmoqda. Qozogʻiston Respublikasi Sogʻliqni saqlash vazirligi matbuot xizmati tarqatgan xabarda, ayni paytda oʻtkir respirator virusli infeksiyalar hamda gripp bilan kasallanishning mavsumiy oʻsishi kuzatilayotgani, shu bilan birga metapnevmovirus infeksiyasi mamlakatda ham qayd etilganini maʼlum qildi. 

Hozirda Oʻzbekiston aholisining 36,9 foizida gripp virusi, 30,2 foizida rinovirus, 28,6 foizida respirator-sinsitial virus, 1,2 foizida metapnevmovirus hamda  3,1 foizida boshqa viruslar aniqlangan. 

Ushbu virusdan himoyalanish uchun gigiyena qoidalariga rioya qilish, odamlar gavjum joylarga, ayniqsa yosh bolalarni olib yurishni cheklash lozim. Bundan tashqari, kasallik belgilari paydo boʻlgan oila aʼzolarini alohida saqlab, shifokor koʻrsatmasiga asosan davolatish kerak.