Ўзбекистонда янги хавфли вирус тарқалдими?

Қайд этилишича, метапневмовирус инфекцияси биринчи марта 2001 йилда аниқланган. Ушбу касаллик ҳаво-томчи йўли билан, камдан-кам ҳолатларда эса ифлосланган юзалар билан алоқа қилиш орқали юқади. Вирус асосан куз-қиш мавсумида юзага чиқади. 

Метапневмовирус инфекцияси, одатда бурун оқиши, йўтал ва иситма каби белгилар билан ўткир респираторли инфекциялар шаклида намоён бўлади. Баъзи ҳолларда бронхиолит ҳамда пневмонияни келтириб чиқаради. Метапневмовирус инфекцияси билан касалланган одамларнинг аксарияти асоратларсиз тузалиб кетади. 

Бугунги кунда мазкур вирус бутун дунёда кенг тарқалмоқда. Қозоғистон Республикаси Соғлиқни сақлаш вазирлиги матбуот хизмати тарқатган хабарда, айни пайтда ўткир респиратор вирусли инфекциялар ҳамда грипп билан касалланишнинг мавсумий ўсиши кузатилаётгани, шу билан бирга метапневмовирус инфекцияси мамлакатда ҳам қайд этилганини маълум қилди. 

Ҳозирда Ўзбекистон аҳолисининг 36,9 фоизида грипп вируси, 30,2 фоизида риновирус, 28,6 фоизида респиратор-синситиал вирус, 1,2 фоизида метапневмовирус ҳамда  3,1 фоизида бошқа вируслар аниқланган. 

Ушбу вирусдан ҳимояланиш учун гигиена қоидаларига риоя қилиш, одамлар гавжум жойларга, айниқса ёш болаларни олиб юришни чеклаш лозим. Бундан ташқари, касаллик белгилари пайдо бўлган оила аъзоларини алоҳида сақлаб, шифокор кўрсатмасига асосан даволатиш керак.