Oʻzbekistonlik kurashchilar Osiyo chempionatida 6 ta medalga sazovor boʻldi

Janubiy Koreyaning Kvesan shahridagi Madaniyat va sport markazida kurash boʻyicha davom etayotgan Osiyo chempionatining kattalar oʻrtasida oʻtgan ikkinchi kungi musobaqalarida Oʻzbekiston terma jamoasi aʼzolari 4 ta oltin va 2 ta bronza medalini qoʻlga kiritdi.

Terma jamoa aʼzolari Sanjar Saidqulov -60 kilogrammda,  Muhammad Jumayev -73 kilogrammda,  Umid Esanov -81 kilogrammda, Shohista Nazarova -70 kiloda qitʼa chempioni nomiga musharraf boʻldi. 

Shuningdek, tojikistonlik Sarvar Abdushukurov -66 kiloda, turkmanistonlik Sabina Qodirova -78 kiloda, vetnamlik Chang Thi Thanh Thuy -87 kiloda, Koreya Respublikasi vakilasi Kim Min Yon +87 kiloda gʻoliblik shohsupasiga koʻtarildi. 

Medallar jamgʻarishda Oʻzbekiston jamoasi 6 ta medal bilan umumjamoada peshqadamlik qilayotgan boʻlsa, Tojikiston, Turkmaniston, Vetnam va Janubiy Koreya keyingi pogʻonalarni band etib turibdi. 

Bugun, 4 avgust kuni chempionatning soʻnggi kunida yigitlar -90, -100, -120, +120 kilogramm vazn toifalarida bellashsa, xotin-qizlar -48, -52, 57 va -63 kilogramm ogʻirlikda gilamga chiqadi. 

Eslatib oʻtamiz, kattalar, yoshlar va oʻsmirlar oʻrtasida oʻtkazilayotgan qitʼa chempionatida 25 ga yaqin davlatlarning kurashchilari ishtirok etmoqda.