Polsha Belarusdagi fuqarolarini mamlakatni tark etishga chaqirdi

“Tashqi ishlar vazirligi Belarusda boʻlgan Polsha fuqarolarini darhol mavjud tijorat yoki shaxsiy transport vositalaridan foydalanib, mamlakatni tark etishga chaqiradi”, — deyiladi xabarda.

Elchixonaga koʻra, agar ikki mamlakat orasidagi vaziyat yomonlashsa yoki chegaralar yopilsa, polshaliklarni evakuatsiya qilishi yoki umuman imkonsiz boʼlishi mumkin.

25-sentabrdan Polsha va Belarus oʻrtasida chegara harakati tiklangan. Yoʻlovchilar uchun faqat “Terespol — Brest” oʻtish punkti ochiq, yuk tashish esa “Koroshchin (Kukuryki) — Kozloviche” orqali amalga oshirilmoqda. 25-sentabr ertalabki holatga koʻra, Polsha tomoniga chiqishni taxminan 4 ming avtomobil va avtobus kutayotgan edi.

Polsha 12-sentabr kuni Belarus bilan chegarani yopgan, bunga Rossiya va Belarusning qoʻshma “Zapad-2025” harbiy mashgʻulotlari boshlanishi sabab qilib koʻrsatilgan. Lukashenko esa Varshavaning bu qarorini “Xitoyga qarshi doʻstona boʻlmagan qadam” deb atagan.

Eslatib oʻtamiz, avvalroq Rossiya Polsha va Estoniya havo hududini noqonuniy buzib oʻtgan edi. Shundan soʻng NATO seshanba kuni yigʻilish oʻtkazgan edi. Ammo shuncha vaqt oʻtgan boʻlsa ham NATOga aʼzo dav;atlar hali hamon Rossiyaga nisbatan hech qanday chora koʻrmayotgani haqida xabar bergan edik.