Rossiya Polsha va Estoniya davlatlarining havo chegarasini buzib oʻtdi. NATOdagilar esa hamon jim

Telekanal manbalari maʼlum qilishicha, baʼzi davlatlar, xususan, Polsha va Estoniya yigʻilish yakunlari boʻyicha qoʻshma bayonotda Rossiya Federatsiyasi tomonidan havo hududini buzib kirish holatlariga kuch bilan javob qaytarilishi aniq belgilanishini xohlagan. Shu bilan birga, Germaniya va Janubiy Yevropa davlatlari bunday taʼrif istalmagan eskalatsiyaga olib kelishi mumkinligini taʼkidlagan.

Yakunda murosali formulirovka qabul qilingan. Bayonotning rasmiy matnida aytilishicha, NATO va uning ittifoqchilari xalqaro huquqqa muvofiq «oʻzini himoya qilish va har qanday yoʻnalishdagi har qanday tahdidlarni qaytarish uchun barcha zarur harbiy va noharbiy vositalardan» foydalanadi.

«Biz oʻzimiz tanlagan usulda, vaqtda va yoʻnalishda javob berishda davom etamiz», – deyiladi hujjatda.

Telekanal manbalari taʼkidlashicha, ushbu epizod alyansning Rossiya harakatlariga munosabat bildirish masalasida konsensusga erishishi qanchalik qiyinligini koʻrsatadi.

Soʻnggi bir necha hafta ichida Rossiya dronlari va samolyotlari tomonidan NATO mamlakatlari havo hududini buzish bilan bogʻliq bir qator hodisalar kuzatildi.

Xususan, 10 sentabrga oʻtar kechasi Polshaga 20 dan ortiq dron uchib kirgandi, ularni qarshi olish uchun Polsha va ittifoqchilarning qiruvchi samolyotlari havoga koʻtarildi, bir necha dron urib tushirdi.

13 sentabr kuni esa Rossiya droni Ruminiya hududiga uchib kirdi, yana qiruvchi samolyotlar havoga koʻtarildi, biroq bir necha daqiqadan soʻng dronning oʻzi mamlakat havo hududini tark etdi.

19 sentabr kuni Estoniya Rossiyaning uchta qiruvchi samolyoti havo hududini buzib oʻtgani va Estoniya osmonida 12 daqiqa qolib ketganini maʼlum qildi. Shu kuni Polsha Rossiyaning ikkita qiruvchi samolyoti Boltiq dengizidagi burgʻilash platformasi ustidan past balandlikda uchib oʻtganini maʼlum qildi.

CNN'ning NATOdagi manbasi fikricha, Rossiya shu yoʻl bilan alyans mudofaasidagi zaif nuqtalarni oʻrganmoqda, shuningdek, tashkilot oʻz aʼzolarini himoya qilish uchun nima qila olishini tekshirmoqda.