Poytaxtdagi elektr taʼminotidagi muammolar boʻyicha energetika vaziriga senator soʻrovi yuborildi

Toshkent shahrida elektr energiyasi taʼminotida soʻnggi paytlarda uzilishlar koʻpaygani aholining kundalik hayoti, ijtimoiy soha obʼektlari va tadbirkorlik faoliyatiga salbiy taʼsir koʻrsatmoqda.

Aholi va tadbirkorlar tomonidan elektr taʼminotidagi 3–4 soatlik uzilishlar boʻyicha koʻplab murojaatlar bildirilmoqda. Ushbu uzilishlar nafaqat fuqarolarning kundalik turmush tarziga, balki tadbirkorlik subʼektlari faoliyatiga ham salbiy taʼsir koʻrsatmoqda. Ijtimoiy infratuzilma obʼektlarining barqaror ishlashida ham muammolar yuzaga kelmoqda.

Xususan, svetoforlar faoliyatidagi uzilishlar transport harakatini tartibga solishda qiyinchilik tugʻdirmoqda, bu esa yoʻl harakati xavfsizligiga tahdid solmoqda. Shuningdek, ishlab chiqarish va savdo obʼektlarida sovutish tizimlarining ishdan chiqishi natijasida yirik moliyaviy zararlar yuzaga kelayotgani, xonadonlarda esa maishiy texnika vositalarining ishdan chiqishi holatlari aniqlanmoqda.

Maʼlumot uchun, “Elektr energetikasi toʻgʻrisida”gi Qonunning 39-moddasiga koʻra, elektr energiyasi isteʼmolchilari sifatli va barqaror elektr energiyasini olish huquqiga ega. Shuningdek, ushbu Qonunning 61-moddasida taʼkidlanishicha, taʼminotni toʻxtatish yoki cheklash faqatgina baxtsiz hodisalarning oldini olish yoki avariyalarni bartaraf etish maqsadida amalga oshirilishi mumkin.

Shu munosabat bilan Senatning Agrar, suv xoʻjaligi masalalari va ekologiya qoʻmitasi raisi oʻrinbosari Sayyora Abdikarimova tomonidan tegishli tushuntirishlar berish  maqsadida Oʻzbekiston Respublikasi Energetika vaziri Joʻrabek Mirzamahmudov nomiga senator soʻrovi yuborildi.