Putin tashrifi munosabati bilan Toshkentdagi bir qancha taʼlim muassasalarida imtihonlar boshqa sanaga koʻchirildi

Xususan, Moliya institutidagi yakuniy imtihonlar dushanba kuni o‘tkazilmasligi dushanba tongida talabalarga ma’lum qilingan. Bunga esa Rossiya Prezidenti Vladimir Putinning O‘zbekistonga tashrifi sabab sifatida keltirilgan. Yunusobod tumanidagi “Toshkent irrigatsiya va qishloq xo‘jaligini mexanizatsiyalash muhandislari instituti” milliy tadqiqot universiteti huzuridagi aniq fanlarga ixtisoslashtirilgan maktabda ham Putin tashrifi munosabati bilan dushanba kuniga belgilangan imtihonlar qoldirilganligi o‘quvchilarga aytilgan.

Aniqlashimizcha, O‘zbekiston Respublikasi Oliy ta’lim, fan va innovatsiyalar vaziri Kongratbay Sharipovning 24- may kuni imzolangan 01/10-579 sonli buyrug‘i bilan shaharda yo‘l qurilish-ta’mirlash ishlari olib borilishi munosabati bilan "talabalarga qulayliklar yaratish maqsadida" 27- may kuni Toshkent shahridagi oliy ta’lim muassasalarida darslar va yakuniy imtihonlar bekor qilingan. Talabalarning bizga xabar qilishicha, ushbu buyruq haqida dushanba kuni ertalab ma’lum qilingan. 24- may kuni imzolangan buyruq 27- may tongida talabalarga e’lon qilinganligi va ushbu holat poytaxtimizda bo‘lib turgan Rossiya Federatsiyasi Prezidenti Vladimir Putining shaharda harakatlanishi bilan bog‘liq transport cheklovlariga aloqador ekanligi haqidagi savollar so‘roq ostida qolmoqda.

Bu borada Oliy ta’lim, fan va innovatsiyalar vazirligi matbuot xizmatiga qilgan qo‘rg‘irog‘imiz ham javobsiz qoldi.