Qoraqalpogʻistonda rossiyalik jurnalist qoʻlga olindi

Axborot va ommaviy kommunikatsiyalar agentligining Qoraqalpogʻiston boʻyicha hududiy boshqarmasiga koʻra, jurnalistlar Oʻzbekiston Respublikasi Tashqi ishlar vazirligida akkreditatsiyadan oʻtmasdan turib, mamlakat hududida faoliyat koʻrsatgan. 

"Bu harakat amaldagi qonunchilikni buzish hisoblanadi. Hozirda qoʻlga olinganlar Nukus shahri ichki ishlar boshqarmasida boʻlib, hodisa yuzasidan barcha holatlar oʻrganilmoqda", deyiladi boshqarma tomonidan berilgan munosabatda.

Rossiyalik jurnalist Aleksey Pivovarov oʻzining Telegram'dagi kanalida ahvoli yaxshiligini, huquq-tartibot organlari unga  xushmuomalalik koʻrsatganini bildirgan. 

"Aytganimdek, biz hozir Oʻzbekistondamiz. Nukusda boʻlganimizda Ichki ishlar vazirligi xodimlari suhbatga taklif qilishdi. Biz gaplashdik, oʻzimiz va rejalarimiz haqida gapirib berdik, xodimlar xushmuomalalik koʻrsatib, toʻgʻri muomala qildi. Hozir yana yoʻlga tushamiz. Hammasi yaxshi!", deya yozgan Aleksey Pivovarov.

Maʼlumot uchun, Aleksey Pivovarov Rossiyaning taniqli telejurnalisti boʻlib, u NTV va boshqa telekanallarda ishlagan. Shuningdek, u soʻnggi yillarda postsovet va uzoq xorij mamlakatlari haqida bir qator koʻrsatuvlar eʼlon qilgan "Redaksiya" YouTube kanalining muallifi hamdir.