Qoraqalpogʻistonda uch kishi is gazidan halok boʻldi

2025 yil 13 dekabr kuni Qoraqalpogʻiston Respublikasi Xoʻjayli tumani Samankoʻl mahallasi Faxriylar koʻchasida joylashgan uyda uch kishi is gazidan zaharlanish oqibatida vafot etdi.

Tuman hokimligi matbuot xizmati maʼlumotiga koʻra, fuqaro A.J mazkur uyni ijaraga olib, ikki nafar nabirasi bilan yashab kelgan. Uyni isitish maqsadida fuqaro tomonidan qoʻlbola isitish pechi oʻrnatilgan.

Maʼlum qilinishicha, pechning moʻrisi kesib tashlanib, u boshqa xonaga koʻchirilgan va moʻrisiz holda gaz tarmogʻiga ulangan. Natijada gaz yonishidan hosil boʻlgan tutun — is gazi uy ichiga toʻplangan.

Oqibatda fuqaro A.J va uning nabiralari — 14 yoshli A.S (8-sinf oʻquvchisi) va 10 yoshli A.Q (4-sinf oʻquvchisi) kuchli zaharlanib, hodisa joyida vafot etgan.

Hodisa yuzasidan tegishli idoralar tomonidan surishtiruv ishlari olib borilmoqda.