Rossiyada "Gʻalaba kuni" arafasida Ukrainadan tortib olingan tanklar namoish etilmoqda

Koʻrgazmada Germaniyada ishlab chiqarilgan Leopard 2, AQShga tegishli Abrams tanklari va Bradley jangovar zirhli mashinasi, Buyuk Britaniyada ishlab chiqarilgan Husky va Mastiff rusumli harbiy avtomashinalar, Fransiyaning AMX-10 RC, Avstraliyaning Bushmaster, Shvetsiyaning CV90 jangovar avtomobillari bor. Shuningdek, tadbir doirasida turli oʻqotar qurollar, Ukraina hududidan qoʻlga kiritilgan hujjatlar, xaritalar va dronlar ham namoyish etilishi koʻzda tutilmoqda.

France Press axborot agentligining yozishicha esa, Rossiya qoʻlga kiritgan harbiy texnikalarning aksariyati yaroqli emas. Ular aynan ishlamay qolganligi sababli tashlab ketilgan. “Kreml bunday shovshuvli koʻrgazmani oʻz xalqini ruhlantirish uchun uyushtirgan boʻlishi mumkin,” deyiladi agentlik xabarida.

Avvalroq rus armiyasi Ukrainada bir kunda 43 ta artilleriya tizimi, 20 ta zirhli patrul mashinasi va 11 tankidan ajralib qolgani haqida xabar bergan edik.