Rossiyada migrantlarni ishdan boʻshatish tartibi soddalashtirildi

Tegishli oʻzgartishlar Mehnat kodeksiga kiritildi.

Avval xorijiy fuqarolar faqat federal qonunlar, prezident farmonlari yoki hukumat qarorlarida belgilangan asoslar boʻyicha ishdan boʻshatilishi mumkin edi. Endi bu roʻyxatga mintaqaviy hukumat qarorlari ham qoʻshildi. Bu esa, agar hududda migrantlar soniga cheklov belgilansa, ish beruvchilar unga qatʼiy rioya etishi shartligini anglatadi.

Davlat Dumasi deputati Igor Antropenko maʼlum qilishicha, belgilangan mintaqaviy kvotadan oshib ketish 800 mingdan 1 million rublgacha jarimaga sabab boʻlishi mumkin. Shuningdek, kompaniya faoliyati 90 kungacha toʻxtatilishi ehtimoli ham bor.

Shu bois, limitdan oshib ketilgan taqdirda, koʻplab ish beruvchilar xorijiy ishchilar bilan tuzilgan mehnat shartnomalarini bekor qilishga majbur boʻladi.

2025 yil noyabr oyida hukumat 2026 yil uchun kvotalarni tasdiqlagan edi. Unga muvofiq, joriy yilda viza asosida kelgan 278 900 nafar xorijiy ishchiga ruxsat beriladi. Kirish taklifnomalari va ishlash ruxsatnomalari uchun ham xuddi shuncha miqdorda kvota ajratilgan.

Eng katta kvotalar ishlab chiqarish va qurilish sohalariga toʻgʻri keladi. Jumladan, oziq-ovqat, yogʻochni qayta ishlash, toʻqimachilik va kiyim-kechak sanoatida 71 088 nafar, qurilish sohasida 55 312 nafar, metallga ishlov berish va mashinasozlikda 45 391 nafar xorijiy ishchiga ruxsat berilgan.

Muhim jihat: agar siz ishlayotgan mintaqada cheklovlar joriy etilsa, ish beruvchi mehnat shartnomasini qonuniy asosda bekor qilishi mumkin. Shuning uchun oʻz hududingizdagi vaziyatni oldindan oʻrganish va rasmiy maʼlumotlarni muntazam kuzatib borish tavsiya etiladi.