Shavkat Mirziyoyev “Yangi Oʻzbekiston” bogʻiga yondosh qurilgan zamonaviy mehmonxonalar bilan tanishdi

Bir paytlar qarovsiz yotgan manzillar bugun obod maskanga aylangan. 8 gektardan ziyod maydonda 12 ta zamonaviy mehmonxona, 375 oʻrinli “Yangi Toshkent” konferensiya zali, 310 oʻrinli restoran, sogʻlomlashtirish markazi hamda ochiq sport maydoni barpo etilgan.

Mehmonxonalarga Qoraqalpogʻiston va viloyatlar nomi berilgan. Ular 3 yulduzli boʻlib, 5 qavatdan iborat, 62 ta xona va 124 oʻringa ega. Majmua yagona konsepsiya asosida faoliyat yuritadi va uning boshqaruvi xalqaro tajribaga ega “Leo Hospitality Solutions”, “Radisson Individuals”, “Trademark Collection by Wyndham” kabi nufuzli kompaniyalarga topshiriladi.

Xususiy banklar shu kabi majmualar boshqaruviga sherik boʻlib kirish taklifini bildirdi. Davlat rahbari xizmat sohalari kengayishi, joylarda zamonaviy maskanlar koʻpayishi aholi farovonligiga hissa qoʻshishini taʼkidladi.

Mehmonxonalar restoran, anjumanlar zali va dam olish maskanlari bilan uygʻun qurilgani xizmat qamrovini oshiradi. Bu yerda yuqori darajadagi tadbirlar hamda yirik xalqaro anjumanlar oʻtkazilishi ham mumkin.

Majmuada 540 ta yangi ish oʻrni yaratilib, yiliga oʻrtacha 55 ming turistga xizmat koʻrsatilishi koʻzda tutilgan. Bu yer mahalliy va xorijiy sayyohlar uchun yana bir lokatsiya, Toshkent vohasida turizm rivoji uchun qoʻshimcha stimul boʻladi. Majmua qurilishi ortidan yon-atrofdagi mahallalarning infratuzilmasi ham yaxshilanib, aholi farovonligi taʼminlandi.

Davlat rahbari majmuada xizmat turlarini koʻpaytirish va sifatini oshirish, mahalliy va xorijiy sayyohlarni jalb etish masalalariga eʼtibor qaratdi. Bunday koʻp tarmoqli xizmatlarni boshqa hududlarda ham keng yoʻlga qoʻyish muhimligi taʼkidlandi.