Sirdaryoda 300 ga yaqin mansabdor jarimaga tortildi — Ekologiya vazirligi

Bayon qilinishicha, Sirdaryo viloyati Ekologiya, atrof-muhitni muhofaza qilish va iqlim oʻzgarishi boshqarmasi tomonidan "Yashil makon" umummilliy loyihasi doirasida ekilgan koʻchatlarning parvarishi boʻyicha doimiy nazorat reydlari oʻtkazib kelingan.

"Reydlar davomida joriy yilning 8 oyi davomida jami 267 nafar mansabdorga chora koʻrildi. Bunda 2023 yil kuz va 2024 yil bahor mavsumlarida ekilgan koʻchatlarni parvarishlashda agrotexnik ishlar bajarilmaganligi va sugʻorish tizimi yoʻlga qoʻyilmaganligi sababli ayrim koʻchatlar qurib qoldi", deyiladi xabarda.

Yuqoridagi holatlar yuzasidan mansabdorlarga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksining 79-moddasi 3-qismi hamda 95-moddalari bilan maʼmuriy bayonnomalar rasmiylashtirilgan. Mansabdorlarga nisbatan jami 730 million 150 ming soʻm jarima qoʻllanilgan.

Maʼlumot uchun, Oʻzbekiston Prezidentining 2021 yil 30 dekabrdagi “Respublikada koʻkalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari toʻgʻrisida”gi PF-46-sonli farmoni ijrosi taʼminlash maqsadida 2024 yilning bahor mavsumida 125 million tup daraxt va butalarni muhofaza qilish hamda yashil maydonlarni kengaytirish, "Yashil bogʻ", "Yashil belbogʻ” tashkil etish borasida 2024-yil 7 martda 144-sonli Vazirlar Mahkamasining farmoyishi qabul qilingan.