Afgʻonistondan Oʻzbekistonga olib kirilgan harbiy texnikalar kimga tegishli?

"Amerika Ovozi" jurnalisti Navbahor Imamova elchidan 2021 yilda afgʻon harbiylari tomonidan Oʻzbekistonga olib oʻtilgan aviatexnikalarning taqdiri qanday kechishini soʻrar ekan, elchi bunga javoban mazkur mavzuni davom ettirish oʻrinsiz ekanligini va allaqachon bu masala oʻz yechimini topganini bildirdi. 

"Bu mavzu haqida muloqotni davom ettirish oʻrinsiz. Muammo allaqachon hal qilingan deb oʻylayman. Dastur tafsilotlarini hozircha muhokama qilolmaymiz", deya elchi intervyuda qisqa javob berdi.

Shuningdek, u jurnalistning navbatdagi savoliga ham, yaʼni oʻz vaqtida "Tolibon" tomonidan elchiga qarata bildirilgan eʼtirozlar vaziyatni oʻzgartiradimi deya bergan savoliga bu haqida hech qanday izoh yoʻq deb javob qaytargan. 

Maʼlumot uchun, joriy yilning avgust oyida Jonatan Xenik afgʻonlar tomonidan AQShdan oʻgʻirlangan harbiy samolyotlar va vertolyotlar Oʻzbekistonda qolishi boʻyicha AQSh – Oʻzbekiston tomonlari bitim imzolaganini aytgan edi. 

Bunga javoban "Tolibon" Mudofaa vazirligi X tarmogʻida Xenikning bu gapiga AQSh Afgʻonistonning Oʻzbekistondagi vertolyot- samolyotlari va Afgʻon xalqining mol-mulkini xayriya yoki musodara qilish huquqiga ega emasligini eslatib oʻtgandi. Bundan tashqari, "Tolibon" hukumati Oʻzbekistonni bu kabi har qanday kelishuvlardan voz kechishga chaqirgan. 

Siyosatshunos Hamza Boltayevning PARADIGMA.UZ'ga maʼlum qilishicha, xalqaro huquq nuqtayi nazaridan bu harbiy samolyotlar "Tolibon"ga tegishli emas.

"Bu qurol-yarogʻlarning baʼzilari haqiqatdan ham Amerikaga tegishli, baʼzilari oldingi Afgʻoniston Islom Respublikasiga kelishilgan shartnomalar orqali berilgan. Agar xalqaro huquq nuqtayi nazaridan aytadigan boʻlsak, hozirgi "Tolibon"ni hech kim tan olmagan. Agar tan olinmagan boʻlsa, "Tolibon" oldingi Afgʻoniston Islom Respublikasining qonuniy davomchisi emas. 

Xalqaro huquq tomonidan aytadigan boʻlsak, bu qurol-aslahalar oldingi Afgʻoniston hukumatiga tegishli boʻlganda ham "Tolibon"ga tegishli emas. Rasmiy hujjatlar boʻyicha aytganda, ularning chiqib gapirishlaridan bunga asosi yoʻq", deydi siyosatshunos.