Buyuk Britaniya Yevropa Migratsiya Tarmog‘iga kuzatuvchi davlat sifatida qo‘shildi

2026-yil 19-iyun kuni Bryusselda Yevropa Komissiyasi bilan Buyuk Britaniya Ichki ishlar vazirligi o‘rtasida Ma’muriy Kelishuv imzolandi.

Ushbu hujjat orqali Buyuk Britaniya Yevropa Migratsiya Tarmog‘ida (EMN)  kuzatuvchi davlatga aylandi.

Migratsiya va ichki ishlar bo‘yicha Bosh direktor Beate Gminder kelishuvni imzolash uchun Buyuk Britaniyaning Migratsiya va chegaralar guruhi Bosh direktori Dan Hobbs bilan uchrashdi.

Tomonlar Buyuk Britaniya, Yevropa migratsiya tarmog‘iga a’zo mamlakatlar (Daniyadan tashqari Yevropa Ittifoqi a’zolari) hamda kuzatuvchi davlatlarda (Norvegiya, Gruziya, Moldova Respublikasi, Ukraina, Chernogoriya, Armaniston, Serbiya, Shimoliy Makedoniya Respublikasi, Albaniya) boshpana berish va migratsiya masalalari borasida zamonaviy, xolis, ishonchli va qiyosiy ma’lumotlar almashishga kelishib oldi.

Mazkur ma’muriy kelishuv hamkorlikni mustahkamlash va axborot almashinuvini samarali yo‘lga qo‘yish yo‘lidagi muhim qadamdir. EMN — siyosiy qarorlar ishlab chiqishga yordam berish maqsadida migratsiya, boshpana berish va ichki ishlar bo‘yicha ma’lumot beruvchi umumyevropa tarmog‘idir.

Buyuk Britaniya kuzatuvchi davlat sifatida EMN nashrlari, konferensiyalari va boshqa tadbirlariga hissasini qo‘shish orqali tarmoq faoliyatini rivojlantirishga ko‘maklashadi.