Ozarbayjon Rossiyadagi barcha tadbirlarni bekor qilmoqda

Hukumatning bu qarori "Rossiya huquq-tartibot idoralari tomonidan etnik kelib chiqishi boʻyicha Yekaterinburgda ozarbayjonliklarga nisbatan namoyishkorona, maqsadli va suddan tashqari qotilliklar hamda zoʻravonlik harakatlari sodir etilgani munosabati bilan" qabul qilingan.

Maʼlum boʻlishicha, joriy yilning 27 iyun kuni Yekaterinburgda 50 dan ortiq ozarbayjonlik qoʻlga olingan. Mazkur hibsga olishlar 2001 yilda ozarbayjonlik Yunus Pashayevning oʻldirilishi boʻyicha ochilmagan jinoiy ish, shuningdek, 2010—2011 yillarda sodir etilgan yana ikkita jinoyat bilan bogʻliq.

Ushbu ish boʻyicha gumondor sifatida qoʻlga olingan aka-uka Guseyn va Ziyoddin Safarovlar hibsga olinishlar vazqtida vafot etgan. E1.ru nashri manbasiga koʻra, ulardan birining yuragida muammolar kuzatilgan va vafot etgan. Ikkinchisida ham, "xuddi shunday vaziyat" kuzatilgani aytilmoqda.

Ozarbayjon Tashqi ishlar vazirligi 27 iyun kuni Rossiya xavfsizlik kuchlari tomonidan oʻtkazilgan reydlar bilan bogʼliq vaziyatlar uchun Rossiyaning Ozarbayjondagi elchixonasi muvaqqat ishlar vakili Pyotr Volokovichni chaqirtirilgan.

Rossiya Tashqi ishlar vazirligi rasmiy vakili Mariya Zaxarovaga koʻra, Volokovich "Ozarbayjon tomoniga zarur tushuntirishlar bergan" va "vaziyat huquq-tartibot idoralari nazorati ostida ekaniga ishontirgan".  29 iyun kuni Yekaterinburgning Lenin tuman sudi qotillik ishi boʻyicha gumon qilingan uch kishini tergov izolyatoriga yuborgan. Sud yana uch nafar mahbusga nisbatan ehtiyot chorasini tanlashi kutilmoqda.

Ozarbayjon va Rossiya oʻrtasidagi sovuqchilik joriy yil boshida Ozarbayjon samolyotining urib tushirilishidan keyin jiddiylasha boshladi. Bunday voqealar fonida prezident Ilhom Aliyev Rossiya Federatsiyasi prezidenti Vladimir Putinning 9 may kuniga bagʻishlangan harbiy paradda ishtirok etmagan edi.