"Pikovit" - Pivovit nomi bilan chiqarilgan. Namanganda qalbaki dori vositalari fosh etildi

Davlat xavfsizlik xizmati, Iqtisodiy jinoyatlarga qarshi kurashish departamenti hamda Bojxona qoʻmitasi xodimlari hamkorligida noqonuniy dori vositalari aylanmasiga qarshi kurashish yoʻnalishida Namangan shahrida tezkor tadbir oʻtkazildi. 

Tadbir davomida biologik faol qoʻshimchalar ishlab chiqarish bilan shugʻullanuvchi masʼuliyati cheklangan jamiyat rahbari tomonidan belgilangan tartib-qoidalarga zid ravishda dori vositalarini tayyorlash maqsadida tashkil etilgan sex koʻzdan kechirildi.

Tekshiruv jarayonida noqonuniy sexda 5,6 milliard soʻmlik 23 dona turli hajmdagi maxsus idishlar ashyoviy dalil sifatida rasmiylashtirildi. Shuningdek, oʻrtacha 30 milliard soʻmlik tovar-moddiy boyliklar aniqlandi. Xususan,

• qiymati 1,2 milliard soʻmdan ortiq boʻlgan 9 turdagi 138 031 quti dori vositalari va biologik faol qoʻshimchalar,
• 1,8 milliard soʻmlik prekursorlar,
• 3,4 milliard soʻmlik flakon, qopqoq, quti va etiketkalar,
• 18 milliard soʻmlik 14 nomdagi ishlab chiqarish uskunalari,
• hamda 5,6 milliard soʻmlik 23 dona katta va kichik hajmdagi maxsus idishlar ashyoviy dalil sifatida rasmiylashtirib olindi.

Qoʻlbola dori vositalari turli viloyatlarga tarqatilgan

Tekshiruv jarayonida aniqlanishicha, qoʻlbola usulda tayyorlangan ushbu dorilar Fargʻona vodiysi, Toshkent shahri va boshqa viloyatlarga yetkazib berilgan.

Hozirda qalbaki dori vositalari boʻyicha ekspertiza tayinlanib, surishtiruv ishlari olib borilmoqda.