TDT rahbarlari Shimoliy Kiprni turk dunyosining ajralmas qismi ekanini tasdiqlashdi

Turkiy Davlatlar Tashkiloti (TDT) asl aʼzolari — Oʻzbekiston, Turkiya, Ozarboyjon, Qozogʻiston va Qirgʻiziston liderlari imzolagan bayonotda TDT aʼzolarining tinchlik, xavfsizlik, barqarorlik va farovonlikka boʻlgan sadoqatlari tasdiqlanib, xavfsizlik va barqarorlikni mustahkamlashga qaratilgan majburiyatlar yana bir bor taʼkidlandi. Bayonotda turk davlatlari oʻrtasida barcha sohalarda hamjihatlik, hamkorlik va muvofiqlashuvni kuchaytirishga boʻlgan mustahkam qatʼiylik ifoda etildi.

Bayonotda «Turkiy davlatlar oʻrtasida strategik hamkorlik, abadiy doʻstlik va qardoshlik shartnomasi» loyihasini koʻrib chiqishni tezlashtirish chaqiruvi qilindi.

Liderlar Islomga nisbatan har qanday nafratga qarshi kurashish va bu holatni hal qilish uchun xalqaro platformalarda saʼy-harakatlarni muvofiqlashtirish boʻyicha oʻz majburiyatlarini yana bir bor tasdiqladilar.

Ozarboyjon va Armaniston oʻrtasida Ozarboyjonning asosiy hududlari bilan Naxichevon Avtonom Respublikasi oʻrtasida toʻsiqsiz aloqani taʼminlaydigan, mintaqa tranzit salohiyatini yuzaga chiqaradigan, tinchlik, barqarorlik va farovonlikka hissa qoʻshadigan aloqa yoʻllarini ochishga oid kelishuv mamnuniyat bilan qabul qilingani qayd etildi. Bayonotda «Aʼzo davlatlar Zangezur koridori loyihasini ishlab chiqish va rivojlantirish yoʻlidagi saʼy-harakatlarni qoʻllab-quvvatlashlarini bildirgani, Boku-Tbilisi-Qars temir yoʻlidan eng yuqori salohiyat bilan foydalanish majburiyatlarini yana bir bor tasdiqlagani, shu bilan birga, Trans-Kaspiy Xalqaro Sharq-Gʻarb oʻrta koridori hamda Xitoy-Qirgʻiziston-Oʻzbekiston temir yoʻlini mintaqalararo bogʻliqlikni kuchaytirish, Yevropa bilan Osiyo orasidagi savdo yoʻllarini diversifikatsiya qilish nuqtai nazaridan muhim ekanligini taʼkidlagani» qayd etildi.

Kipr muammosi boʻyicha esa oroldagi mavjud realliklarga asoslanib, kelishilgan, oʻzaro qabul qilinadigan va amalga oshirilishi mumkin boʻlgan yechimga erishish zarurligi qayd etildi. Bayonotda TDT aʼzolarining «Turk dunyocining ajralmas qismi boʻlgan Kipr turk xalqi bilan ularning teng huquqlarini taʼminlash istaklarida hamjihat ekanliklari» qayd etildi.

Bayonotda Gʻazodagi gumanitar vaziyatning yomonlashib borayotganidan chuqur tashvish bildirilib, shoshilinch va doimiy otashkesim hamda gumanitar yordamga toʻsiqsiz kirish imkoniyatini taʼminlashga chaqiriq qilindi.

Isroil-Falastin mojarosiga adolatli va doimiy yechim topish zarurligiga urgʻu berilgan bayonotda 1967 yilgi chegaralar asosida poytaxti Sharqiy Quddus boʻlgan Falastin davlatini koʻzda tutgan ikki davlatli yechim BMTning tegishli qarorlariga muvofiq amalga oshirilishi zarurligi qayd etildi.

Suriya masalasiga ham toʻxtalib oʻtilgan bayonotda TDT aʼzolari Suriyaning hududiy yaxlitligi, birligi hamda mamlakat xavfsizligi, barqarorligi va tiklanishiga qaratilgan qoʻllab-quvvatlashlarini yana bir bor tasdiqladilar.