Xitoyda oliy ta’limga qiziqish pasaymoqda

Yakshanba kuni boshlanishi rejalashtirilgan milliy oliy ta’lim muassasalariga kirish imtihonida qatnashadigan xitoylik abituriyentlar soni o‘tgan yilga nisbatan 450 mingga kamayib, 12,9 million nafarni tashkil etdi. Bunga ko‘plab o‘smirlarning akademik daraja olishdan voz kechayotgani sabab bo‘lmoqda.

Ta’lim vazirligi tomonidan chorshanba kuni e’lon qilingan raqamlar kollej yoshidagi xitoylik o‘smirlar sonining tarkibiy qisqarishi hamda 16 yoshdan 24 yoshgacha bo‘lganlar orasida ishsizlik darajasi 16 foizdan oshgan murakkab mehnat bozori sharoitida kuzatilmoqda.

Tahlilchilarning fikricha, bu yozda mehnat bozoriga rekord darajadagi 12,7 million nafar oliy ma’lumotli bitiruvchi kirib kelishi kutilmoqda. Demak, ishsizlik ko‘rsatkichlari yomonlashadi.

Ko‘rsatkichlarning ketma-ket ikkinchi yil pasayishi

O‘tgan yili ham abituriyentlar soni 2024-yilga nisbatan 70 mingga kamaygan edi.

Vazirlik ushbu raqamlar pasayishi yuzasidan izoh bermadi, ammo yolg‘on reklama, yuqori to‘lovlar, firibgarlik yoki qalloblikni tashkil etish kabi noqonuniy harakatlarga qarshi qat’iy kurashilishini ma’lum qildi.

Kasb-hunar kollejlari ommalashmoqda

Ko‘pchilik talabalar tobora to‘liq stavkali ish bilan ta’minlaydigan kasbiy ta’lim dasturlarini tanlayotgani sababli o‘qishga qiziqishning pasayishi yuz bermoqda.

May oyida Pekindagi kasb-hunar maktablaridan birida mavjud 30 ta bo‘sh o‘ringa farzandlarini ro‘yxatdan o‘tkazish uchun yuzlab ota-onalar navbatga turgan. 

Shanxayda esa kasb-hunar kollejlariga qabul uch yil avvalgiga qaraganda 15 foizga oshgan.

Yoshlar cho‘ponlikka ham rozi

Xitoylik fermer Zuo Syaoyong onlayn vakansiya joylashtirganidan so‘ng, Mo‘g‘uliston janubidagi olis va qir-adirlardan iborat yaylovlarda cho‘ponlik qilish uchun atigi ikkita o‘ringa 700 dan ortiq kishi ariza topshirgan.

Uning reklamasi Weibo tarmog‘ida bir necha soat ichida 59 million marta ko‘rilib, Shanxay va Chunsin kabi megapolislardagi ofis xodimlari, butun Xitoy bo‘ylab zavod ishchilari va hatto universitet bitiruvchilaridan arizalar kelib tushdi.

Bunday holat mamlakat mehnat bozorida raqobat jiddiy kuchayib borayotganidan dalolat.

Xitoyda joriy yil imtihon topshiradigan millionlab abituriyentlar uchun shaffoflik choralari kuchaytirilgan: mobil telefonlar, aqlli ko‘zoynaklar kabi qurilmalar yordamidagi ko‘chirmakashlikning oldini olish uchun aqlli tekshiruv tizimlari qo‘llaniladi.