Хитойда олий таълимга қизиқиш пасаймоқда

Якшанба куни бошланиши режалаштирилган миллий олий таълим муассасаларига кириш имтиҳонида қатнашадиган хитойлик абитуриентлар сони ўтган йилга нисбатан 450 мингга камайиб, 12,9 миллион нафарни ташкил этди. Бунга кўплаб ўсмирларнинг академик даража олишдан воз кечаётгани сабаб бўлмоқда.

Таълим вазирлиги томонидан чоршанба куни эълон қилинган рақамлар коллеж ёшидаги хитойлик ўсмирлар сонининг таркибий қисқариши ҳамда 16 ёшдан 24 ёшгача бўлганлар орасида ишсизлик даражаси 16 фоиздан ошган мураккаб меҳнат бозори шароитида кузатилмоқда.

Таҳлилчиларнинг фикрича, бу ёзда меҳнат бозорига рекорд даражадаги 12,7 миллион нафар олий маълумотли битирувчи кириб келиши кутилмоқда. Демак, ишсизлик кўрсаткичлари ёмонлашади.

Кўрсаткичларнинг кетма-кет иккинчи йил пасайиши

Ўтган йили ҳам абитуриентлар сони 2024 йилга нисбатан 70 мингга камайган эди.

Вазирлик ушбу рақамлар пасайиши юзасидан изоҳ бермади, аммо ёлғон реклама, юқори тўловлар, фирибгарлик ёки қаллобликни ташкил этиш каби ноқонуний ҳаракатларга қарши қатъий курашилишини маълум қилди.

Касб-ҳунар коллежлари оммалашмоқда

Кўпчилик талабалар тобора тўлиқ ставкали иш билан таъминлайдиган касбий таълим дастурларини танлаётгани сабабли ўқишга қизиқишнинг пасайиши юз бермоқда.

Май ойида Пекиндаги касб-ҳунар мактабларидан бирида мавжуд 30 та бўш ўринга фарзандларини рўйхатдан ўтказиш учун юзлаб ота-оналар навбатга турган. 

Шанхайда эса касб-ҳунар коллежларига қабул уч йил аввалгига қараганда 15 фоизга ошган.

Ёшлар чўпонликка ҳам рози

Хитойлик фермер Зуо Сяоёнг онлайн вакансия жойлаштирганидан сўнг, Мўғулистон жанубидаги олис ва қир-адирлардан иборат яйловларда чўпонлик қилиш учун атиги иккита ўринга 700 дан ортиқ киши ариза топширган.

Унинг рекламаси Weibo тармоғида бир неча соат ичида 59 миллион марта кўрилиб, Шанхай ва Чунсин каби мегаполислардаги офис ходимлари, бутун Хитой бўйлаб завод ишчилари ва ҳатто университет битирувчиларидан аризалар келиб тушди.

Бундай ҳолат мамлакат меҳнат бозорида рақобат жиддий кучайиб бораётганидан далолат.

Хитойда жорий йил имтиҳон топширадиган миллионлаб абитуриентлар учун шаффофлик чоралари кучайтирилган: мобил телефонлар, ақлли кўзойнаклар каби қурилмалар ёрдамидаги кўчирмакашликнинг олдини олиш учун ақлли текширув тизимлари қўлланилади.