Xitoy Tayvanga tashrif buyurganlarga sanksiya qo‘llayapti

Xitoy elchixonasining parlament rasmiylari orqali “The Associated Press” agentligiga bergan xabariga ko‘ra, Pekin Yangi Zelandiyaning to‘rt nafar qonunchisiga parlament safari doirasida Tayvanga borgani uchun bir yil muddatga Xitoyga kirishni taqiqlagan. Shuningdek, ulardan uzr so‘rashni talab qilgan.

Pekin avval ham boshqa mamlakat qonunchilariga Tayvan bilan aloqalari tufayli sanksiyalar qo‘llagan, biroq Yangi Zelandiya parlamentariylari bilan bog‘liq bunday holat ilk bor kuzatilmoqda. Pekin so‘nggi yillarda o‘z hududi deb da’vo qiladigan, demokratik boshqariluvchi Tayvanga bosimni kuchaytirib kelmoqda.

Yangi Zelandiya hukumati Pekinning rasmiy safarlarga qo‘ygan taqiqlaridan xavotirda ekanini ma’lum qildi.

“Saylangan mansabdorlar may oyida Taypeyga tashrif buyurishgan, Yangi Zelandiya parlament a’zolari buni o‘n yillardan beri qilib kelishadi”, — deyiladi tashqi ishlar vaziri vakili bergan bayonotda.

Pekin Taypeyning tashqi aloqalarni yuritishga haqqi yo‘qligini hamda xorijlik qonunchilarning orolga tashrifini Xitoyning suverenitet da’volariga qarshi harakat deb bilishini ta’kidlamoqda.

Xitoy Tashqi ishlar vazirligi matbuot kotibi Mao Nin payshanba kuni sanksiyalarni tasdiqladi.

“Biz tegishli shaxslarni Xitoy suvereniteti va hududiy yaxlitligini hurmat qilishga hamda “Yagona Xitoy” tamoyiliga qat’iy rioya etishga chaqiramiz”, – dedi Mao Pekinda o‘tkazilgan navbatdagi brifingda.

Yangi Zelandiya Tashqi ishlar vazirligi matbuoti ushbu tashrif “Yagona Xitoy” siyosatiga zid emasligini ta’kidladi.

Yangi Zelandiya Tayvan hukumati bilan diplomatik aloqalarga ega dunyodagi 12 davlat qatoriga kirmaydi.