Buzilayotgan turar va noturarjoy obʼektining bozor qiymati toʻliq qoplab beriladi

Unga koʻra, 2025 yil 1 maydan boshlab qurilishni boshlashdan foydalanishga ruxsatnoma berishga qadar boʻlgan jarayonlar toʻliq onlayn rejimida "Shaffof qurilish" tizimida amalga oshiriladi. 

Shuningdek, qurilishi tugallangan koʻp kvartirali uy-joydan foydalanishga ruxsatnoma berishda faqat Qurilish va uy-joy kommunal xoʻjaligi sohasida nazorat qilish inspeksiyasi, hamda davlat yongʻin nazorati organlaridan xulosa olinadi. 

Inspeksiyada roʻyxatdan oʻtgan va u tomonidan nazorat qilinadigan koʻp kvartirali uy-joylarni foydalanishga ruxsatnoma berishdan oldin instrumental-texnik tekshiruvdan oʻtkazish amaliyoti bekor qilinadi. 

2025 yil 1 martdan renovatsiya asosida koʻp kvartirali uy-joylarni barpo etishda renovatsiya loyihasini boshlashga barcha mulkdorlar bilan notarial tasdiqlangan kelishuv bitimi imzolanganidan soʻng ruxsat beriladi. 

Mulkdorlarga, ularning xohishiga koʻra, quyidagi kompensatsiya turlaridan biri taqdim etiladi:

— Buzilayotgan turarjoy obʼektlari oʻrniga ularning maydonidan kam boʻlmagan renovatsiya dasturiga muvofiq yangi quriladigan turarjoylardan yashash uchun tayyor holdagi kvartiralarni mulk huquqi asosida berish hamda qurilish davrida koʻchish, shu jumladan, boshqa turarjoy obʼektini vaqtinchalik ijaraga olish bilan bogʻliq xarajatlarni toʻliq qoplash;

— Buzilayotgan turar va noturar joy obʼektining bozor qiymatini toʻliq qoplab berish;

— Renovatsiya loyihasi tashabbuskori bilan kelishilgan holda boshqa turdagi kompensatsiyani taqdim etish.