Toshkentda BAA kompaniyasi bilan hamkorlikda xalqaro logistika terminali quriladi

Terminal Yangihayot tumanidagi “Yangi avlod” maxsus sanoat zonasi hududida joylashadi. Loyiha doirasida temiryoʻl quruq porti, bojxona rasmiylashtiruvi zonalari, omborlar va kross-doking majmualari barpo etiladi.

Jami 288 million dollarlik investitsiya yoʻnaltirilishi rejalashtirilgan. Ustav kapitalida “Tashkent Invest” 15 foiz, DP World esa 85 foiz ulushga ega boʻladi.

Birinchi bosqichda yiliga 150 ming TEU quvvatga ega temiryoʻl terminali va 63 ming kvadrat metrli ombor majmuasi quriladi. Keyingi bosqichlarda umumiy maydoni 163 ming kvadrat metr boʻlgan qoʻshimcha ombor binolari foydalanishga topshiriladi.

Loyiha Toshkentning milliy temiryoʻl va avtomobil yoʻllari hamda xalqaro aeroport bilan bogʻlanishini taʼminlaydi. Bu esa yuklarni avtomobil, temiryoʻl va havo transporti orqali multimodal tashishni samarali tashkil etishga imkon beradi.

Toshkent shahar hokimi Shavkat Umurzoqov taʼkidlaganidek, mazkur hamkorlik poytaxtning ishlab chiqarish va eksport salohiyatini oshirish, zamonaviy texnologiyalarni joriy etish va investorlarni jalb qilishga xizmat qiladi.

DP World rahbari Sulton Ahmad bin Sulayim Toshkentdagi terminal Markaziy Osiyodagi taʼminot zanjirlari samaradorligini oshirib, mintaqani jahon logistika tarmogʻining muhim halqasiga aylantirishini taʼkidladi.