Тошкентда БАА компанияси билан ҳамкорликда халқаро логистика терминали қурилади

Терминал Янгиҳаёт туманидаги “Янги авлод” махсус саноат зонаси ҳудудида жойлашади. Лойиҳа доирасида темирйўл қуруқ порти, божхона расмийлаштируви зоналари, омборлар ва кросс-докинг мажмуалари барпо этилади.

Жами 288 миллион долларлик инвестиция йўналтирилиши режалаштирилган. Устав капиталида “Ташкент Инвест” 15 фоиз, DP World эса 85 фоиз улушга эга бўлади.

Биринчи босқичда йилига 150 минг TEU қувватга эга темирйўл терминали ва 63 минг квадрат метрли омбор мажмуаси қурилади. Кейинги босқичларда умумий майдони 163 минг квадрат метр бўлган қўшимча омбор бинолари фойдаланишга топширилади.

Лойиҳа Тошкентнинг миллий темирйўл ва автомобиль йўллари ҳамда халқаро аэропорт билан боғланишини таъминлайди. Бу эса юкларни автомобиль, темирйўл ва ҳаво транспорти орқали мультимодал ташишни самарали ташкил этишга имкон беради.

Тошкент шаҳар ҳокими Шавкат Умурзоқов таъкидлаганидек, мазкур ҳамкорлик пойтахтнинг ишлаб чиқариш ва экспорт салоҳиятини ошириш, замонавий технологияларни жорий этиш ва инвесторларни жалб қилишга хизмат қилади.

DP World раҳбари Султон Аҳмад бин Сулайим Тошкентдаги терминал Марказий Осиёдаги таъминот занжирлари самарадорлигини ошириб, минтақани жаҳон логистика тармоғининг муҳим ҳалқасига айлантиришини таъкидлади.