Toshkentda chinor daraxtiga zarar yetkazgan fuqaro 20 mln soʻmdan ziyod jarima toʻlaydi

Bayon qilinishicha, Toshkent shahar Ekologiya, atrof-muhitni muhofaza qilish va iqlim oʻzgarishi boshqarmasi tomonidan Uchtepa tumanida navbatdagi reyd tadbirlari oʻtkazildi. 

Reyd davomida tumandagi "Boʻgʻobod" MFY Foziltepa koʻchasidagi qurilish obʼekti hududida bir tup chinor daraxtining tag qismi fuqaro I.D. tomonidan atayin betonlanganligi aniqlangan. buning oqibatida tabiatga 1 million 500 ming soʻm zarar yetkazilgan. 

Holat yuzasidan huquqbuzarga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksi (MJtK)ning 79-moddasi 1-qismi bilan maʼmuriy bayonnoma rasmiylashtirilgan. I.D.ga nisbatan bazaviy hisoblash miqdorining 50 baravari — 18 million 750 ming soʻm jarima belgilandi. Huquqbuzar qilmishi uchun jami 20 million 250 ming soʻm tovon toʻlaydigan boʻldi. 

Maʼlumot uchun, MJtKning 79-moddasiga koʻra, daraxtlarni, butalarni, boshqa oʻsimliklarni va nihollarni qonunga xilof ravishda kesish, kundakov qilish, shikastlantirish, yoʻq qilish yoki boshqa joyga koʻchirib oʻtkazish fuqarolarga bazaviy hisoblash miqdorining 25 baravaridan 50 baravarigacha, mansabdor shaxslarga esa 50 baravaridan 75 baravarigacha miqdorda jarima solishga sabab boʻladi.