O‘zbekistonda XI Yevropa kino festivali bo‘lib o‘tadi

Festival doirasida badiiy, hujjatli va animatsion filmlar namoyish etiladi. Ular orasida oilaviy munosabatlar, do‘stlik, shaxsiy tanlovlar, tarixiy shaxslar hayoti va inson taqdiri haqidagi asarlar bor.

Toshkentdagi namoyishlar 23–25-oktabr kunlari O‘zbekiston Milliy kino san’ati saroyida bo‘lib o‘tadi. Urganchda esa 27-oktabr kuni Xudoybergan Devonov nomidagi kinoteatrda uchta film namoyish etiladi.

Festivalning Toshkentdagi dasturi 23-oktabr kuni Litvaning «Kiprik qoqishni unutma», Fransiyaning «Qor qoplonini izlab» va Italiyaning «Ennio» filmlari bilan boshlanadi.

24-oktabr kuni Kipr, Sloveniya va Gretsiya filmlari, 25-oktabrda esa Lyuksemburg, Latvия va Ruminiya kinolari tomoshabinlarga taqdim etiladi.

Urganchda Fransiya va Lyuksemburg hamkorligida yaratilgan «Bog‘dagi qayiq», Germaniyaning «Karla» hamda Gretsiyaning «Momiq ayiqcha hayotidan bir kun» filmlarini ko‘rish mumkin.

Shuningdek, 28-oktabr kuni Britaniya Kengashining O‘zbekistondagi vakolatxonasi O‘zbekiston davlat jahon tillari universiteti bilan hamkorlikda talabalar uchun qisqa metrajli filmlar namoyishini tashkil etadi. Moc Hub madaniy makonida ham keng jamoatchilik uchun filmlar taqdim etiladi.

Festival 2013-yildan buyon Yevropa Ittifoqining O‘zbekistondagi delegatsiyasi va mamlakatda akkreditatsiyadan o‘tgan Yevropa davlatlari elchixonalari tomonidan O‘zbekiston Respublikasi Madaniyat vazirligi huzuridagi Kinematografiya agentligi ko‘magida tashkil etib kelinmoqda.

Barcha namoyishlar bepul. Filmlar asl tilida, o‘zbek va/yoki rus tilidagi subtitrlar bilan namoyish etiladi.

Festivalning to‘liq dasturi va namoyishlar jadvali bilan O‘zbekistondagi Yevropa Ittifoqi delegatsiyasining rasmiy sahifasida tanishish mumkin.