Toshkentda tunda bepul parking joriy etiladi: kimlar foydalana oladi?

Unga koʻra, pullik parkinglar yaqinida yashovchi aholi tunda avtomobillarini bepul qoldirish imkoniyatiga ega boʻladi.

Yangi tartib 16 oktabrda qabul qilingan hokim qaroriga kiritilgan oʻzgartirishlar asosida tasdiqlangan boʻlib, u aholining uyi yaqinidagi pullik avtoturargohlardan foydalanish qoidalarini belgilab beradi.

Kimlar uchun tunda bepul?

Rezident sifatida tan olinadigan jismoniy shaxslar quyidagilar hisoblanadi:

• pullik avtoturargoh joylashgan koʻchada yoki unga tutash hududda yashovchilar;
• mazkur manzilda uy-joyga egalik huquqi yoki ulushiga ega boʻlgan shaxslar;
• avtomobildan foydalanuvchi fuqarolar.

Ushbu toifadagi aholi rezidentlik avtoturargoh ruxsatnomasini olish huquqiga ega boʻladi.

Tunda bepul, kunduzi — imtiyozli

Rezidentlik ruxsatnomasi rasmiylashtirilgan avtomobil:

• 20:00 dan 08:00 gacha — bepul;
• qolgan vaqtda — pullik asosda, biroq rezidentlik imtiyozi bilan joylashtirilishi mumkin.

Muhim: ushbu imtiyozlar yuk avtomobillari hamda nogironlar uchun moʻljallangan maxsus parkovkalarga tatbiq etilmaydi.

Rezidentlik ruxsatnomasi nima?

Rezidentlik ruxsatnomasi — bu “Elektron hukumat” tizimi orqali shahar reyestriga kiritiladigan elektron yozuv hisoblanadi.

Ruxsatnoma faqat bitta avtomobil uchun beriladi. U:

• rezidentning oʻziga tegishli boʻlishi,
• yoki Toshkent shahrida doimiy roʻyxatdan oʻtgan shaxs nomida boʻlishi mumkin.

Bir manzil uchun ikkitadan ortiq rezidentlik ruxsatnomasi rasmiylashtirish imkoniyati mavjud.

Toʻlov miqdori

• yillik rezidentlik toʻlovi — 1 BRV (412 ming soʻm);
• toʻlov yilda bir marta amalga oshiriladi;
• ruxsatnoma 12 oy davomida amal qiladi.

Uzaytirish tartibi

Agar ruxsatnomani uzaytirish uchun ariza:

• muddat tugashidan 2 oydan oldin emas,
• va kamida 6 ish kuni oldin topshirilsa,

yangi ruxsatnoma eskisining muddati tugashi bilan avtomatik ravishda kuchga kiradi.

Shuningdek, 14 kundan oshmagan holda toʻlangan davrni avtomatik uzaytirish imkoniyati ham mavjud.

Yangi tartib 2026 yil 1 fevraldan amalga kiritiladi.