Тошкентда тунда бепул паркинг жорий этилади: кимлар фойдалана олади?

Унга кўра, пуллик паркинглар яқинида яшовчи аҳоли тунда автомобилларини бепул қолдириш имкониятига эга бўлади.

Янги тартиб 16 октябрда қабул қилинган ҳоким қарорига киритилган ўзгартиришлар асосида тасдиқланган бўлиб, у аҳолининг уйи яқинидаги пуллик автотураргоҳлардан фойдаланиш қоидаларини белгилаб беради.

Кимлар учун тунда бепул?

Резидент сифатида тан олинадиган жисмоний шахслар қуйидагилар ҳисобланади:

• пуллик автотураргоҳ жойлашган кўчада ёки унга туташ ҳудудда яшовчилар;
• мазкур манзилда уй-жойга эгалик ҳуқуқи ёки улушига эга бўлган шахслар;
• автомобилдан фойдаланувчи фуқаролар.

Ушбу тоифадаги аҳоли резидентлик автотураргоҳ рухсатномасини олиш ҳуқуқига эга бўлади.

Тунда бепул, кундузи — имтиёзли

Резидентлик рухсатномаси расмийлаштирилган автомобиль:

• 20:00 дан 08:00 гача — бепул;
• қолган вақтда — пуллик асосда, бироқ резидентлик имтиёзи билан жойлаштирилиши мумкин.

Муҳим: ушбу имтиёзлар юк автомобиллари ҳамда ногиронлар учун мўлжалланган махсус парковкаларга татбиқ этилмайди.

Резидентлик рухсатномаси нима?

Резидентлик рухсатномаси — бу “Электрон ҳукумат” тизими орқали шаҳар реестрига киритиладиган электрон ёзув ҳисобланади.

Рухсатнома фақат битта автомобиль учун берилади. У:

• резидентнинг ўзига тегишли бўлиши,
• ёки Тошкент шаҳрида доимий рўйхатдан ўтган шахс номида бўлиши мумкин.

Бир манзил учун иккитадан ортиқ резидентлик рухсатномаси расмийлаштириш имконияти мавжуд.

Тўлов миқдори

• йиллик резидентлик тўлови — 1 БРВ (412 минг сўм);
• тўлов йилда бир марта амалга оширилади;
• рухсатнома 12 ой давомида амал қилади.

Узайтириш тартиби

Агар рухсатномани узайтириш учун ариза:

• муддат тугашидан 2 ойдан олдин эмас,
• ва камида 6 иш куни олдин топширилса,

янги рухсатнома эскисининг муддати тугаши билан автоматик равишда кучга киради.

Шунингдек, 14 кундан ошмаган ҳолда тўланган даврни автоматик узайтириш имконияти ҳам мавжуд.

Янги тартиб 2026 йил 1 февралдан амалга киритилади.