Toshkentdagi ekologik xavfli 87 ta korxona shahar tashqarisiga koʻchiriladi

Toshkent shahri hududida joylashgan ekologik jihatdan xavfli 87 ta sanoat korxonasi bosqichma-bosqich shahar tashqarisiga koʻchiriladi. Bu haqda Ekologiya va iqlim oʻzgarishi milliy qoʻmitasi maʼlum qildi.

Ushbu chora-tadbirlar Prezidentning 2025 yil 30 yanvarda qabul qilingan “Oʻzbekiston — 2030” strategiyasini “Atrof-muhitni asrash va yashil iqtisodiyot yili”da amalga oshirishga oid davlat dasturiga muvofiq amalga oshirilmoqda.

Hujjatga koʻra, ekologik xavfi yuqori va energiya sarfi katta boʻlgan ishlab chiqarish quvvatlarini modernizatsiya qilish hamda ularni shaharlardan tashqariga koʻchirish rejalashtirilgan. 

Maʼlum qilinishicha, Toshkent shahrida ushbu talablarga javob beradigan 87 ta korxona aniqlangan. Ularni koʻchirish mavjud ishlab chiqarish quvvatlarini yangilash va texnologik jarayonlarni zamonaviy ekologik standartlarga moslashtirish sharti bilan amalga oshiriladi.

Belgilangan vazifalar ijrosini taʼminlash maqsadida maxsus komissiya tomonidan sanoat obʼektlarida doimiy tekshiruvlar oʻtkazilmoqda. Xususan, ekologik xavfli I toifaga kiruvchi “Oʻzvtorsvetmet” AJ faoliyati toʻxtatilib, korxona Jizzax viloyatidagi sanoat hududiga koʻchirilishi belgilandi.

2025 yil oktabr oyida oʻtkazilgan tekshiruvlar davomida mazkur korxona tomonidan atrof-muhitni ifloslantirish holatlari aniqlangan. Natijada korxonaga majburiy koʻrsatma berilgan va yetkazilgan ekologik zarar uchun 18 milliard 91 million 717 ming 137 soʻm miqdorida kompensatsiya hisoblangan.

Maʼlum qilinishicha, ushbu mablagʻlar hisobidan eski va ekologik jihatdan zararli eritish pechlari utilizatsiya qilinadi hamda ishlab chiqarish zamonaviy, ekologik talablarga javob beradigan uskunalarda davom ettiriladi.

Koʻrilgan choralar natijasida atmosferaga chiqariladigan zararli moddalar hajmi yiliga oʻrtacha 226,7 tonnaga kamayishi kutilmoqda. Bu esa Toshkent shahrining Yangixayot tumanida havo sifati sezilarli darajada yaxshilanishiga xizmat qiladi.